پێنج هەلبەستێن تەلال ئەلغەوار
سەرخوەشی ب ئەڤینێ
تنێ جارەكێ
بهێلە ئەڤین تە دگەل خوە ببت
تو دێ جیهانێ بینی
هەچكو تو یێ وەغەرێ
د هەلبەستەكێ دا دكی و
دێ ئەسمانەكێ
ب فرەهیا چەنگێن پەلاتینكێ بینی و
رویبارێن دفرن
ئو تو ب پێنگاڤێن ژ خوە رازی
ژ كەتنێ دەرباز دبی و
دار ب سترانێن خوە یێن كەسك
ل پەی تە دئێن
نەڤەگەرە
دئەڤینێ دا بمینە
یانژی دێ خوە لبن دارەكا
ل سیها خوە ل بیابانا هزرێ دگەرت
بینی .
دزی
هەردەم
ب دزیكیڤە ژ خەوا خوە
خەونێن خوە یێن خوەش
لبن بالگیهێ خوە ڤەدشێرم
لێ لەپێ رۆژێ فێربوویە ب دزیكیڤە
ژ كەلشێن تاڤێ بێتە خوارێ و
بو خوە ببت .
هەلبەست
لسەر چەنگێ گرنژینەكێ
دئێت و
روحامن دگەڤێست دەما گولەكا سوور تێوەردكت
چاوا پەیڤێن من دێ شێن بگرن و
ئەو وەك رۆژێن من
بلەز دبورت
ئەو رۆژێن من باش نەگرتین و
ژناڤ تبلێن من ڤەرەستین
مینا پەلاتینكەكا سەرخوەش .
بوونەكا ب كۆتەك
بلەز و بێ پویتدان
ئاوری ژ من دبوورن و
ئەز لسەر تەقشكەكێ
ل باخچەی بتنێ مە
ل وی دەمێ دناخێ خودا
گوور دچووم خوارێ هەتا كو ئێك ژ قێژیێن خوە یێن نڤستی من هشیاركری
ئەوێن دبوورین ڤەجنقین و
ل من دنێرین.
ل دوماهیا شەڤێ
ل دوماهیا شەڤێ
هەلبەست تبلێن خوە
د پەنجەرێ دا درێژ دكت و
دوورترین ستێرێ
دچنت .
وەرگێڕان ژ ئەرەبی : حەسەنێ سلێڤانەیی
تەلال ئەلغەوار : هەلبەستڤانەكێ ئیراقییە ژ دایكبوویێ سالا 1953ل پارێزگەها سەلاحەدین .دەرچوویێ زانكۆیا بەغدایە ، پشكا ئەرەبی .
دەه دیوانێن هەلبەستان هەنە . ئەندامێ ئێكەتیا نڤیسەرێن ئیراقێ یە . ئەندامێ سەندیكا رۆژنامەڤانێن ئیراقێ یە. هەلبەستێن وی بیاڤەكێ رەخنەیی یێ باش ژ ئالیێ رەخنەگرانڤە وەرگرتیە .
پشكداری د پتریا فەستیڤال ودیدارێن هەلبەستێ دا ل ئیراقێ كریە ، ل فەستیڤالا هەلبەستێ یائێكێ ل سەلاحەدین 27-28/1/2024 و مەربەدا 35 ل بەسرا 7-10/2/2024 مە ئیكودو ژ نێزیكڤە ناسكریە .
من ئەڤ هەلبەستە ژ دیوانا و ی یا بناڤێ – هەلبەست ل دەمەكی دی دگەرت – 2023 وەشانخانا الامل الجدبد – دمشق ، وەرگێراینە .
