پێنچ بیرێن ئاڤێ هشكبووینە و مەترسیا هشكبوونێ ل سەر 20 بیران هەیە
دهۆك، لەزگین جوقی
رێڤەبەرێ ئاڤا بەردەرش دیار كر: حوكمەتا هەرێما كوردستانێ ب گوژمێ دوو ملیار دیناران بۆ بەلاڤكرنا ئاڤێ ب سەر خەلكێ بەردەرش دا تەرخان كرینە و نوكە ل بەردەرش پێنچ بیرێن ئاڤێ هشكبووینە و مەترسیا هشكبوونێ ل هژمارەكا بیرێن ئاڤێ هەیە و گۆت: كار ل سەر كولانا 23 بیرێن نوی یێن ئاڤێ بۆ بەردەرەش دهێتە كرن، ئەڤ بیرێن ئاڤێ ب گوژمێ دوو ملیار دیناران دهێنە بجهئَنان و هەموو هەولدان دهێنە كرن بۆ نەهێلانا ئاریشێن ئاڤا ڤەخوارنێ ل دەڤەرا بەردەرەش.
رێبەر نازم، رێڤەبەرێ ئاڤا بەردەرەش بۆ رۆژناما ئەڤرۆ راگەهاند:» رازەمەندی ل سەر چێكرنا هژمارەكا پرۆژەیێن ئاڤێ ب خەلكێ بەردەرش هاتیە كرن، ژ وانا ژی 10 بیرێن نوی یێن ئاڤێ ب گوژمێ 660 ملیۆن دیناران ل سەر بۆدجەیا وەزارەتا شارەوانی و گەشت و گوزارێ ل بەردەرش دهێنە چێكرن، ئەڤ پرۆژە د قوناغێن بجهئینانێ دانە، ژ وانا ژی دوو پرۆژە هاتینە بجه ئێنان كار ل سەر پرۆژەیێن دی ژی هێتە كرن دا كو بهێنە بجهئینان بۆ خزمەتكرنا وەلاتیێن دەڤەرا بەردەرش».
ئاماژە دا وێ چەندێ ژی كو سێ ناحیە دگەل 107 گوندان گرێدایێ رێڤەبەرێ ئاڤا بەردەرشێ نە و تیمێن رێڤەبەری بەردەوام د ئەركی دانە بۆ چارەسەركرنا ئاریشێن ئاڤێ ل هەموو دەڤەران و تۆرێن ئاڤێ دهێنە سەخبێركرن «.
زێدەتر گۆت:» حوكمەتا هەرێما كوردستانێ رازەمەندی ل سەر چێكرنا هژمارەكا پرۆژەیێن نوی یێن ئاڤێ بۆ بەردەرش كریە نوكە ئێدارا پارێزگەها دهۆكێ پرۆژە بووینە تەندەر پشتی هێنە راگەهاندن و بەلیندەر وەردگریت و دێ دەست بجهئینانا وان پرۆژان ژی هێتە كرن، ئەڤ پرۆژە ب گوژمێ ملیارەك و 478 ملیۆن دیناران دهێنە بجهئینان و دێ هەتا 13 بیرێن نوی یێن ئاڤا ڤەخۆارنێ بۆ وەلاتیان هێنە چێكرن».
رێبەر نازم، گۆتژی:» كار ل سەر كولانا 23 بیرێن نوی یێن ئاڤێ بۆ بەردەرش دهێتە كرن، ئەڤ بیرێن ئاڤێ ب گوژمێ دوو ملیار دیناران دهێنە بجهئَنان و هەموو هەولدان دهێنە كرن بۆ نەهێلانا ئاریشێن ئاڤا ڤەخۆارنێ ل دەڤەرا بەردەرش «.
تەكەز كر كو:» پێنچ بیرێن ئاڤا ڤەخوارنێ ل سنۆرێ بەردەرش هشكبووینە و مەترسیا هشكبوونێ ل سەر 20 بیرێن دێ ئاڤێ هەیە ژ ئەگەرێ هشكەسالیی د سالێن بۆریدا رێژا ئاڤا ژێر زەڤی كێمبوویە و بۆریێن ئاڤێ ل سەر گەلەك بیرا هاتینە زێدەكرن بۆ چارەسەركرنا ئاریشا ئاڤا ڤەخوارنێ«.
رێڤەبەرێ ئاڤا بەردەرش دیار كر:» ل ناحیا روڤیا و دارتوو و بەردەرەش و كەلەك پرۆژەیێن ئاڤێ دهێنە بجهئینان، هەر گوندەكێ بیرا وان یا ئاڤێ هشك بیت یان مەترسیا هشكەبوونێ ل سەر هەبیت بیرەكا نوی یا ئاڤا ڤەخوارنێ بۆ وان دهێتە چێكرن».
ئاشكەرا كر:» ریژا ئاڤا ژێر زەڤی ل بەردەرەش كێمبوویە ل هندەك دەڤەران هەتا 40 مەتران كێم بوویە و ل هندەك دەڤەران هەتا 30 مەتران كێم بوویە، لەورا ژی پێنچ بیرێن ئاڤێ هشك بووینە و مەترسیا هشكبوونێ ل سەر 20 بیرێن دی یێن ئاڤێ چێبوویە».
خۆیا ژی كر:» بەری نوكە رێكخراوا هەڤكاریا مە دكرن ب چێكرنا پرۆژەیێن ئاڤا ڤەخوارنێ، لێ نوكە رێكخراو هەڤكارێ ناكەن و هەموو هەڤكاری ژلایێ حكومەتا هەرێما كوردستانێ ڤە دهێتە كرن».
