پێنڤیسێ ڕیفراندۆمێ ب مالێ دونیایێ هەموو یێ نافرۆشیت
شاكر ئەتروشی:
ماموستایەكێ دێرینێ دهۆكێ بەری ریفراندۆمێ ب رۆژەكێ، ژبەر حەزا وی بۆ ئازادی و سەرخۆبوونا كوردستانێ، چوو بازاڕێ زێرنگران ل دهۆكێ و ب زێری ل سەر پێنڤیسەكێ تایبەت نڤێسی (بەلێ بۆ سەربەخۆیا كوردستانێ) و ل رۆژا دەنگدانێ وی و كوڕێ خوە (جەنگەل)ی، ب وی پێنڤیسی دەنگدانێ خوە دان و دبێژیت: هەكە نوكە مالێ ڤێ دونیا هەموویێ بدەنە من ئەز ڤی پێنڤیسی نافرۆشم.
ماموستا (حەمید سالح عەبۆ) رێڤەبەرێ بەرێ یێ رێڤەبەریا گشتی یا پەروەردەیێ ل پارێزگەها دهۆكێ بۆ رۆژنامەیا ئەڤرۆ گۆت: هەلبەت رۆژا 25/9/2017 رۆژەكا پیرۆز و دیرۆكی یە بۆ هەموو مللەتێ كورد، چنكو دوێ رۆژێ دا ریفراندۆما سەربەخۆیا كوردستانێ هاتبوو ئەنجام دان، بۆ وێ رۆژێ ژی من دڤیا تشتەكێ جودا بكەم، ئەو بوو رۆژەكێ بەری ژڤانێ دەنگدانێ، ئانكو ل 24/9/2017 ئەز چوومە بازاڕێ زێرنگران و من ئەڤ پێنڤیسە بر و زێڕنگرەكی ب زێڕی بۆ من ل سەر نڤیسی (بەلێ بۆ سەربەخۆیا كوردستانێ) و رۆژا د دووڤدا من و كوڕێ خوە دەنگێ خوە ب وی پێنڤیسی دا، لەورا ئەڤ پێنڤیسە ل دەف من گەلەكێ ب بها و عەزیزە و هەكە مالێ دونیایێ هەموویێ بدەنە من ئەز نافرۆشم.
