پێنگاڤ … وێستگەهەكە ژبۆ ڤەحەواندنا هەر كوردەكی
شاكر ئەتروشی:
ناڤەندا خانی یا رەوشەنبیری و راگەهاندنێ/پشكا رەوشەنبیری، دوهی رێكەفتی 23/4/2025 سمینارەك ل بن ناڤێ (پێنگاڤ … وێستگەهەكە ژبۆ ڤەحەواندنا هەر كوردەكی) بۆ نڤیسەر و رۆژنامەڤان (ئارام دهۆكی) ل هولا ناڤەندێ ل ئاڤاهیێ تەلەفزیۆنا دهۆك گێڕا و بەڕێز (ئیحسان ئامێدی) بەرپرسێ ناڤەندێ و چەند نڤیسەر و رۆژنامەڤان و هژمارەكا كارمەندێن سەر ب ناڤەندێ ڤە لێ د بەر هەڤبوون.
نڤیسەر و رۆژنامەڤان (ئارام دهۆكی) بابەتێ سمینارا خوە كرنە دو تەوەر، د تەوەرێ ئێكێ دا گۆڤارا پێنگاڤ بۆ بەرهەڤبوویان دا نیاسین و دیاركر كو ل رۆژا 1/11/2009 هژمارا ئێكێ ژ وێ گۆڤارێ ب شێوێ كاغەزی هاتە چاپكرن، د دووڤدا بەردەوام بوون هەتا (55) هژمارە ژێ چاپكرین، پاشان ئەو گۆڤار بوو سایتەكێ ئەلكترونی و هەتا نوكە یا بەردەوامە و پتری (70) نڤیسەران بابەتێن خوە تێدا بەلاڤ دكەن و هەموو ستافێ وان ب شێوەیەكێ سەربەخوە و خۆبەخش كاردكەن و داخواز ژ نڤیسەرێن دهۆكێ كر ب بابەتێن خوە یێن جۆار وجۆر سایتێ وان پتر ب خەملینن.
د تەوەرێ دویێ (ئارامی) بەحسێ ژین و ژیار و كارێ كوردان ل (كەنەدا) كر و دیاركر كو نوكە نێزیكی (40) هزار كوردان ل (كەنەدا) دژین و ل دووماهیێ دەرگەهێ دانوستاندنێ هاتە ڤەكرن و ب ئاراستەكرنا چەند پرسیار و بۆچونان ئەو سمینار گەرمترلێ كر و بەرسڤ ل سەر هاتنە دان.
