پێڤاژۆیا ئاشتیێ گوندێن قەزا باتیفا ئارام کرینە
زاخۆ، دلۆڤان هالۆ:
پشتی پێڤاژوویا ئاشتیێ دناڤبەرا تورکیا و پەکەکێ دا هاتیە ئەنجامدان، چەندین گۆندێن سنوورێ قەزا باتیفا ئارامیەکا باش بخوەڤە دیتییە، گۆندنشین و گەشتیار قەستا جهێن گەشتوگۆزاری یێن ڤان گۆندان دکەن، و خودانێن وان جهێن گەشتوگۆزاری ژی داخواز دکەن کو خزمەتگۆزاریێن زێدەتر بگەهنە ڤان گۆندان.
سەلام تاهر، وەلاتیێ گۆندێ کەشانێ بۆ ڕۆژناما ئەڤرۆ دیار کر، ل دەمێ شەڕێ تورکیا و پەکەکێ گەلەك ئاستەنگ بۆ مە دروست دبوون ب دووراتیا دەهـ مەتران تۆپ ل تەنشت تڕۆمبێلێن مە دکەتن، لێ نوکە گۆندێن دەڤەرا مە ئارامن، داخوازییا مە یا نوکە بتنێ ئەوە ئەڤ جاددە بهێنە چێکرن چونکی ڕێك گەلەك نەخوەشن ب تایبەت ل گۆندێ مە یێ کەشانێ، و ئەڤ چەندە بۆ گۆندنشین و گەشتیاران نەخوەشە.
ئدریس ئەحمەد، خودانێ هاڤینگەهەکێ یە ل گۆندێ کەشانێ دبێژیت:»پشتی ڕاوەستاندنا شەڕێ تورکیا و پەکەکێ ئارامی پتر یا زڤرییە دەڤەرا مە و دووبارە خەلك گەلەك سەرەدانا ڤان هاڤینگەهان دکەن و ڕێژا هاتنا گەشتیاران ژی زێدەبوویە، و ئەم بڤێ چەندێ کەیف خوەشین و داخوازیا مە ئەوە کو کارەب بهێتە گۆندێ مە و گرنگیێ بدەنە چێکرنا جاددەیان».
ئەحمەد محەمەد حاجی، بەرپرسێ بنگەهێ گەشتوگوزارێ ل قەزا باتیفا گۆت:» ئەم وەکو بنگەهێ گەشتوگۆزارا قەزا باتیفا ب هەماهەنگی لگەل ڕێڤەبەرییا گشتی یا گەشتوگۆزارا زاخۆ و قایمقامیا قەزا باتیفا دێ چاڤدێرییا دەڤەرێ کەین ب ڕێکا لیژنەیێن تایبەت ژ بۆ باشترکرنا ئاستێ خزمەتگۆزارییان ل جهێن گەشتوگۆزاری، هەر دیسان بۆ پەیداکرنا ئاسانکارییان بۆ هاتنا گڕۆپێن گەشتیاری بۆ دەڤەرێ، پشتی بڕیارا پێڤاژوویا ئاشتیێ هژمارەکا زۆر یا گۆندان ئارامی بخوە ڤە دیتیه و جارەکا دی دێ خەلك زڤریتە سەر جهـ و وارێن خوە، و کەرتێ گەشتوگۆزارێ ژی ل ڤان جهان دێ چالاك بیت، و گەلەك جهێن گەشتوگۆزاری یێن جوان و بالکێش دێ ل گۆندێن قەزا باتیفا زێدەبن و ئەڤ چەندە ژی دێ بیتە ئەگەر کو هژمارەکا زێدەتر یا گەشتیاران قەستا جهێن گەشتوگۆزاری یێن قەزا باتیفا بکەن».
