پێگـەهـێ تورکـیا ل سـووریێ لاواز دبیت
چاڤدێرێن سیاسی دیار دکەن سەرەدانا هاکان فیدان یا بۆ ئەمریکا د دەمەکێ دایە کو تورکیا گەلەک کارت ژ دەست داینە و چو رۆلەک بۆ ئاگربەستا رۆسیا و ئۆکرانیایێ نەگێرا و ژ بەر خوەنیشادانێن ناڤخوەیی ژی پێگەهێ تورکیا ل سووریێ لاواز بوویە.
چاڤدێرێن سیاسی ل تورکیا دیار دکەن، سەرەدانا هاکان فیدان وەزیرێ دەرڤە یێ تورکیا بۆ ئەمریکا د دەمەکێ دایە کو عەرەبستانا سعوودیێ بوویە ناڤەندا راگەهاندنا ئاگربەستێ د ناڤبەرا رۆسیا و ئۆکرانیایێ دا، چونکی بەری نها تورکیا گەلەک بزاڤ دکرن ئەو دانوستاندنە ل ئەنقەرە بهێنە کرن، لێ نها ل عەرەبستانێ دهێنە کرن و تورکیا چو رۆلەک ژ بۆ راگرتنا شەڕێ د ناڤبەرا رۆسیا و ئۆکرانیایێ دا نەگێرا و پێگەهێ تورکیا د ئاستێ سیاسەتا دەرڤە دا نها گەلەک لاواز بوویە.
ل گۆر باوەریا چاڤدێرێن سیاسی دەستەسەرکرنا سەرۆکێ باژێرڤانیا ئستەنبولێ کو وەکو هەڤڕکێ سەرەکی یێ ئەردۆغانی بۆ هەلبژارتنێن سەرۆک کۆماریێ دهێتە دیتن شاشیەک گەلەک مەزن بوو، کو ژ ئالیێ دەستهەلاتا ئاکپارتیێ ڤە هاتە کرن، چونکی خوەنیشادانێن چەند رۆژ‌ێن بۆری زیانێن گەلەک مەزن یێن ئابووری گەهاندنە تورکیا و بهایێ لیرێ تورکیا ل هەمبەر دۆلاری و پارێن دی یێن جیهانێ گەلەک هاتە خوارێ و کاریگەریا خوە ل سەر پێگەهێ سیاسی یێ تورکیا ل رۆژهەلاتا ناڤین ب تایبەتی ژی ل سووریێ کریە.
گەلەک ژ چاڤدێرێن سیاسی وەسا دبینن نها پێگەهێ تورکیا ل سووریێ گەلەک لاواز بوویە و گەلەک کارتێن بەری نها د دەستێ تورکیا دا نەماینە و د سەرەدانا ڤێ دووماهیێ یا هاکان فیدانی بۆ ئەمریکا دا دێ تورکیا نەچار بیت گەلەک ژ داخوازیێن ئەمریکا و ئسرائیلێ ل دۆر سووریێ قەبوول بکەت، تورکیا دێ نەچار بیت چو ئاستەنگان ل هەمبەر پرۆژەیێ ئەمریکا و ئسرائیلێ دروست نەکەت و ئەو یەک ژی بێگومان د بەرژەوەندیا کوردێن سووریێ دایە، چونکی تورکیا دێ نەچار بیت فشارێن ل سەر کوردان کێم بکەت و ل ئالیێ دی دەستهەلاتا نها یا شامێ ژی ژ بەر لاوازبوونا تورکیا دێ یا نەچار بیت بەرێ خوە بدەتە ئەمریکا و هەروەسا داخوازیێن ئسرائیلێ ژی قەبوول بکەت، ئەو یەک دێ بیتە ئەگەرێ بهێزبوونا پێگەهێ کوردان و دورزیان ل سووریا نوو دا و هەروەسا دێ ئەحمەد شەرع نەچار بیت گەلەک ژ داخوازیێن کوردان ژی ل سووریێ قەبوول بکەت.
