پەرتووكا (ئافرەت و دیرۆك) ب كوردی و عەرەبی هاتە بەلاڤكرن
سۆلین سلێمان:
دلڤین خەلەف، نڤیسەر و ئەنداما مەكتەبا سكرتاریەتا ئێكەتیا ئافرەتێن كوردستانێ، بەری چەند رۆژان پەرتووكەك ب ناڤێ (ئافرەت و دیرۆك) ب هەردو زمانێن كوردی و عەرەبی بەلاڤكر و پێشوازیەكا باش ل پەرتووكا وێ هاتە كرن.
ناڤهاتیێ بۆ رۆژنامەیا ئەڤرۆ گۆت: دڤێ پەرتووكێ دا من دیتنێن خوە یێن ل سەر ئافرەتان ب شێوەیەكێ گشتی یێن دیاركرین و پەرتووك یا گرێدایە ب پرسێن وانڤە، ب تایبەت پشتی ئەو كارەساتێن ب سەرێ ئێزدیان هاتین من دەست ب نڤیسینێ كریە، هەر ژسالا 2016 وەكو بەرپرسا ئەنجۆمەنێ ئافرەتێن شنگارێ و پتر نڤیسینێن من ل سەر كچ و ژنێن وێ كارەساتێ بوون و پشتی كۆمەكا نڤیسینان مە پەرتووكەك ب ناڤێ (ئافرەت و دیرۆك) چاپكر، ناڤەرۆكا وێ ژ چەند بابەتان پێك دهێت كو دیتنێن منن ل سەر ئافرەتان، بۆ نموونە ئافرەتێن روو ب روو تۆندو تیژیێ بووین، ئافرەتێن سەركردە، هەروەسا مە بەحسێ ئافرەتێن شنگارێ كریە و پێكڤەژیانا وان، چنكو ئافرەتان دیرۆكەكا دوور و درێژ یا هەی و ئەڤە وێ چەندێ دگەهینیت كو راستە ئافرەت نیڤا جڤاكی نە و هەكە ئافرەت نەبن جڤاك ژی ب رێڤە ناچیت و من ب چاڤێن خوە دیتیە كا ئافرەت د چو رەوشەكێ دا ژیاینە و چاوا دەرباز بووینە.
