پەرلەمانتارەك: بەغدا بەردەوام 618 ملیار دیناران بۆ هەرێمێ دێ هنێریت
هەولێر، قائید میرۆ:
پەرلەمانتارەكا پارتی ل پەرلەمانێ ئیراقێ ئاشكرا كر، مەهانە هەتا قانوونا بودجەی دهێتە راستڤەكرن هاتنا پارەی ژ بەغدا بۆ هەرێما كوردستانێ دێ بەردەوام بیت و دبێژیت: ئەو زانیاریێن بەحسێ راگرتنا پارەی دكەن چو راستی بۆ نینە.
دكتۆرە نەهلا قادر ئەفەندی، پەرلەمانتارا پارتی ل پەرلەمانێ ئیراقێ بۆ رۆژناما ئەڤرۆ دیار كر، ل گورەی رێككەفتنا هەرێم و بەغدا، بەغدا مەهانە 618 ملیار دیناران بۆ هەرێما كوردستانێ دێ هنێریت هەتا وی دەمێ قانوونا بودجەیێ دهێتە راستڤەكرن و پشكا هەرێما كوردستانێ دهێتە دیاركرن و گۆت: «هنارتنا مووچە و شایستەیێن دارایی یێن فەرمانبەرێن هەرێما كوردستانێ چو منەت تێدا نینە و فەرمانبەرێن هەرێمێ ژی مینا فەرمانبەرێن ئیراقێ ماف هەیە مەهانە مووچەیێ خوە وەربگرن».
ل دۆر گەفێن هەژمارەكا پەرلەمانتارێن شیعە، دكتۆرە نەهلا قادر ئەفەندی گۆت: «راستە هندەك پەرلەمانتارێن شیعە گەفێن ڤێ چەندێ كرینە، كو ژ بەر نەچوونا پەرلەمانتارێن كورد بۆ كۆمبوونا پەرلەمانی یا تایبەت ب دەركرنا هێزێن ئەمریكا دێ رێگریێ ل هنارتنا پارەی بۆ هەرێمێ كەن، بەلێ ئەم خەلكێ خوە پشتڕاست دكەین دێ هاتنا پارەی یا بەردەوام بیت و ئاخڤتنێن وان پەرلەمانتاران چو بنەما بۆ نینە».
