پەرلەمانتارەك: دێ بزاڤا پێكئینانا لژنەیا مادەیێ 140 بۆ بجهئینانا وێ كەین
هەتا نوكە لژنەیا مادەیێ 140 ل جڤاتا نوونەرێن ئیراقێ نەهاتیە پێكئینان، ئەندامەكا جڤاتا نوونەران ژی ژ فراكسیۆنا پارتی دیموكراتی كوردستان ئاماژە ب وێ چەندێ دكەت كو دێ بزاڤا پێكئینانا وی لژنەیێ كەین بۆ چاڤدێری و بجهئینانا مادەیا 140. پەرلەمانتارەكێ دی ژی ب دوور دزانیت پەرلەمانتارێن سوننە و شیعە ڕێكێ بدەن لژنەیا مادەیا 140 ل جڤاتا نوونەران بهێتە پێكئینان.
جڤاتا نوونەرێن ئیراقێ ل 17/2/2026، هەژمارا لژنەیێن خوە یێن بەردەوام ب ڕێكا راستڤەكرنا پەیڕەوێ ناڤخوەیی دیاركر و ژ 25 لژنەیان كرنە 22 لژنە و د دەنگدانا ل سەر وان گوهۆڕینان، لژنەیا بجهئینانا مادەیا 140 ژ دەستوورێ ئیراقێ تێدا نەبوو كو د خولا پێنجێ یا جڤاتا نوونەران وەك لژنەیەكا بەروەخت هاتبوو دیاركرن.
نازك ئەحمەد، ئەنداما جڤاتا نوونەرێن ئیراقێ ژ فراكسیۆنا پارتی دیموكراتی كوردستان ژ بەهرا خانەقینێ ڕاگەهاند» پشتی دیاركرنا لژنەیێن بەردەوام یێن جڤاتا نوونەران، دێ كاری بۆ وێ چەندێ كەین لژنەیا مادەیا 140 بهێتە پێكئینان و هەبوونا وێ لژنەیێ یا گرنگە بۆ چاڤدێرییا بجهئینانا وێ مادەیا دەستووری كو هەتا نوكە یا كارایە».
ل خولا بەرێ یا جڤاتا نوونەران (خولا پێنجێ)، شاخەوان عەبدوللا ژ بەهرا كەركووكێ سەرۆكایەتییا لژنەیا مادەیا 140 دكر كو پترییا ئەندامێن وێ لژنەیێ ژ وان ناڤچەیان بوون كو لژنە ڤەدگریت.
ژ ئالیێ خوەڤە شێروان دووبەردانی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان كو نوونەرێ پارێزگەها نەینەوایە گوت» ب دووری دزانم پەرلەمانتارێن ئەرەب ( ب سوننە و شیعە ڤە) ڕێكێ بدەن لژنەیا مادەیا 140 بهێتە پێكئینان و دێ دژی ڕاوەستن».
لژنەیا مادەیا 140 تایبەتە ب ئێكلاكرنا چارەنڤیسێ دەڤەرێن ناكۆكی ل سەر ل دیالا، كەركووك، سەلاحەدین و نەینەوا، كو هەرسێ قووناغێن قەرەبووكرن، سەرژمێری و ڕاپرسی ڤەدگریت.
