پەرلەمانتارەک ئەگەرێن بەلاڤ نەکرنا ئاھێن خوارنێ دیار دکەت
ئه‌ڤرۆ نيوز:
ئەنداما لژنا ئابووری و وەبەرھێنانێ ل جڤاتا نوونەرێن عیراقێ دیار کر کو ئەگەرێن گیروبوونا بەلاڤکرنا ئاھێن خوارنێ ل سەر وەلاتیان ب تنێ ژبەر وێ چەندی بوویە کو وەزیرێ بازرگانی یێ عیراقێ ھەر ژ ھەیڤا شواتا ئەڤ سالە ھەتا دووماھیا ھەیڤا خزیرانێ گرێبەستێن ئینانا ئاھێن خوارنێ ئێمزا نەکرینە و دبێژیت: ژنوو ڤێ ھەیڤێ وەزیری چار گرێبەست بۆ ئینانا ئاھێن خوارنێ ئیمزا کرن.
نەجیبا نەجیب، ئەنداما لژنا ئابووری و وەبەرھێنانێ ل جڤاتا نوونەرێن عیراقێ بۆ ئەڤرۆ ئاشکرا کر کو پشتی سامان جبوری بوویە وەزیرێ بازرگانی یێ حوکمەتا عیراقێ ب وەکالەت، ڤێ ھەیڤێ ژنوو دەست ب ئیمزاکرنا گرێبەستێن ئینانا ئاھێن خوارنێ کریە د گەل کۆمپانیان و گۆت: “ھەتا نوکە چار گرێبەست بۆ ئینانا ئاھێن خوارنێ ھاتینە ئیمزاکرن”.
وێ ئەنداما جڤاتا نوونەرێن عیراقێ ئەو چەندە ژی خویا کر کو بەدەوامی ب بەلاڤکرنا شەکر، برنج، زەیت و ئاری دێ ھێتە دان و گۆت: “ئەو جۆرێن ئاھێن خوارنێ یێن د ئەڤ سالە دا نەھێنە دان، پێدڤیە وەکو ھەر جار حوکمەتا عیراقێ پارەی وەکو قەرەبووکرن بدەتە وەلاتیان، چونکو حوکمەت پارەی نادەت پێدڤیە ئاھێن خوارنێ بھێنە دان، ھەکە نەھێنە دان دڤێت دەست ب قەرەبووکرنا وەلاتیان بھێتە کرن”.
