پەرلەمانێ ئۆرۆپا پشتەڤانیێ ل قۆناغا ئاشتیێ ل تورکیا دکەت
هژمارەک ژ ئەندامێن پەرلەمانێ ئێکەتیا ئۆرۆپا پشتەڤانیا خوە بۆ دەستپێکرنا قۆناغا ئاشتیێ ل تورکیا دیار دکەن و هلوەشاندنا پەکەکێ و دەستپێکرنا چاکسازیێن سیاسی و قانوونی ژی ل تورکیا ژ بۆ چارەسەرکرنا پرسا کوردی گەلەک گرنگ دبینن.
د کۆمبوونا پەرلەمانێ ئۆرۆپا دا راپۆرتەکا تایبەت ل دۆر رەوشا تورکیا و قۆناغا ئاشتیێ هاتە خواندن و هژمارەک زێدە ژ ئەندامێن پەرلەمانێ ئۆرۆپا پشتەڤانیا خوە بۆ قۆناغا ئاشتیێ یا ل تورکیا دیار کرن و راگەهاندن کو هەلوەستێ دەولەت باخچەلی ژ بۆ چارەسەرکرنا پرسا کوردی و دووماهی هاتنا شەڕێ چەندین سالان ل تورکیا گەلەک گرنگە، ژ بۆ ڤێ یەکێ ژی دڤێت ئاسانکاریێن تەمام بهێنە کرن دا پەکەکە بشێت کۆنگرەیێ هلوەشاندنا خوە ساز بکەت و ب تەمامی دەست ژ چەکان بەردەت، چونکی هەتا چەک د دەستێ پەکەکێ دا بن ژ بۆ چارەسەرکرنا پرسا کوردی ل تورکیا پێنگاڤێن پێدڤی ناهێنە ئاڤێتن.
پەرلەمانتارێن ئۆرۆپا دیار ژی دکەن، گرنگە دەولەتا تورکیا ژی دەست ب قۆناغەکا نوو بکەت، دڤێت چاکسازیێن سیاسی و قانوونی ل تورکیا بهێنە کرن، دڤێت چو ئاستەنگی ل هەمبەر پەروەردا ب زمانێ کوردی ل تورکیا نەمینن و گرنگە دووماهی ب سیاسەتا قەیوومان ژی بهێت، دڤێت دەستهەلاتدارێن نها یێن تورکیا رێزێ ل ئیرادە و داخوازیێن گەلێ کورد بگرن و خوە ژ گۆتارێن توند دوور بکەن، چونکی ئەزموونا چەندین سالێن بۆری ل تورکیا ئەو یەک سەلماندیە کو ب توندوتیژیێ و شەڕی چو پرسەک ناهێتە چارەسەرکرن، ڤێجا گەلەک گرنگە کار بۆ نەمانا شەڕی و توندوتیژیێ بهێتە کرن و ب رێیا سیستەمەک نوو و دیموکراتی هەموو پرسێن هەی ل تورکیا بهێنە چارەسەرکرن.
هژمارەک ژ ئەندامێن پەرلەمانێ ئۆرۆپا داخواز ژ تورکیا کرن کو رێزێ ل بریارێن دادگەها مافێن مرۆڤی یا ئێکەتیا ئۆرۆپا بگریت و دڤێت گرتیێن سیاسی ب تایبەتی ژی سەلاحەدین دەمیرتاش و هەڤالێن وی بهێنە ئازاد کرن، ئەو یەک دێ بیتە دەستپێکەکا نوو، چونکی گرنگە ل تورکیا دادگەه سەربخوە کار بکەن، نابیت دەستهەلاتا نها یا تورکیا دادگەهان نەچار بکەت دا هندەک بریاران بدەن کو ببنە ئەگەرێ ئالۆزیێن زێدەتر ل تورکیا.
ئەو یەک د دەمەکێ دایە کو بەری نها ژی پەرلەمانێ ئۆرۆپا داخواز ژ تورکیا کربوو دووماهیێ ب سیاسەتا قەیوومان ل بینیت و رێزێ ل ئیرادە و دەنگێ گەلێ کورد بگریت و هەروەسا دڤێت سەلاحەدین دەمیرتاش و هەڤالێن وی ژی بهێنە ئازاد کرن.
چاڤدێرێن سیاسی ژی هەلوەستێ پەرلەمانێ ئێکەتیا ئۆرۆپا ل هەمبەر قۆناغا ئاشتیێ و چارەسەرکرنا پرسا کوردی ل تورکیا گرنگ دبینن و داخواز ژ دەستهەلاتا تورکیا دکەن رێزێ ل بریارێن دادگەها مافێن مرۆڤی یا ئۆرۆپا بگریت و وەکو پێنگاڤا ئێکێ ژی دڤێت سەلاحەدین دەمیرتاش بهێتە ئازاد کرن.
