پەرلەمان داخوازا ڤەگەراندنا شوونوارێن کوردان دکەت
ئەڤرۆ:
ئەندامەکا لیژنا پەیوەندی و راگەھاندن و شوونەواران ل پەرلەمانێ کوردستانێ ئاشکرا کر کو لیژنا پەیوەندی و راگەھاندن و شوونەواران ل پەرلەمانێ کوردستانێ دێ ڤەگەراندنا وان پارچێن شوونواری یێن گرێدای ب کوردان ڤە، کو نوکە ل دەڤەرێن دی یێن عیراقێ نە بەحس کەت.
ڤیان عەباس، ئەنداما لیژنا پەیوەندی و راگەھاندن و شوونەواران ل پەرلەمانێ کوردستانێ دیار کر، نە ب تنێ رێکخراوا تیرۆرستیا داعش مەترسیە ل سەر گیان و ژیانا مرۆڤان، بەلکو زیانێ ب پارچێن شوونواری ژی دگەھینیت و بۆ ئەڤرۆ گۆت: “دڤێت کار بۆ پاراستنا وان پارچێن شوونواری یێن گرێدای ب کوردان ڤە بکەین و ژ دەستێ تیرۆرستێن داعش قۆرتال بکەین”.
خویا ژی کر، تێکدانا مۆزەخانا مووسل زیانەکا زۆر ب کەلتۆر و مێژوویا عیراقێ ب گشی و نەتەوێ کورد ب تایبەتی گەھاند، ب مەرەما رێ گرتن ل دوبارەبوونا کارێن ب ڤی رەنگی، دڤێت پێنگاڤێن رژد بھێنە ھاڤێتن.
ڤیان خانێ ئاماژە ب وێ چەندێ ژی کر، د کۆمبوونا لیژنا وان یا بھێت دا دێ دانوستاندنێ ل سەر پرسا ڤەگراندنا وان پارچێن شوونواری یێن گرێدای ب کوردان ڤە کەت و گۆت: “دڤێت حوکمەتا ھەرێما کوردستانێ ھەموو بزاڤان بکەت و ب رەنگەکێ فەرمی داخوازێ ژ حوکمەتا عیراقێ بکەت بۆ ڤەگەراندنا وان پارچێن شوونواری یێن گرێدای ب کوردان ڤە، کو نوکە ل دەڤەرێن جودا یێن عیراقێ نە و مەترسی ل سەرە، دا کو ژ دزین و تالانکرن و تێکدانێ بھێنە پاراستن”.
