پەروەردەكرنا زارۆكان بتنێ خوارن و ڤەخوارن نینن
دلڤین رەشید:
راهێنەرەكا نێڤدەولەتی د بوارێ گەشەپێدانا مرۆڤی دا بۆ رۆژناما ئەڤرۆ دیار كر كو گرنگە دایك و بابان پلانەكا باش ژ بۆ پەروەردەكرنا زارۆكان هەبیت بەری بیننە سەر دنیایێ و گۆت: بلا ئەڤ ئەركە بتنێ د ستویێ دایكێ دا نەبیت.
ئەڤین عەبدوللا راهێنەرا نێڤدەولەتی د بوارێ گەشەپێدانا مرۆڤی دا بۆ روژناما ئەڤرۆ دیار كر، دایك و بابان رولەكێ بەرچاڤ هەیە د پەروەردەكرنا زارۆكان دا، گەلەك گرنگە دایك و بابان پلانەكا باش هەبیت ژ بۆ پەروەردەكرنا زارۆكان بەری بیننە سەر دنیایێ و گۆت: (بلا ئەڤ ئەركە ل سەر ملێن دایكێ بتنێ نەبیت، باشترە دایك و باب هەردوو ڤێ بەرپرسیاریێ ڕاكەن، چونكی د جڤاكێ مەدا ئەركێ پەروەردەكرنا زارۆكان بو دایكێ بتنێ دهێلن).
ئەڤینێ گۆتژی: (بەلێ د قۆناغا نۆكە ئەو هشیاریە بویە كو دایك و باب هەردووك د پەروەردەكرن و پێگەهاندنا زارۆكی دا خۆ بەرپرس دزانن) .
راهێنەرا نێڤدەولەتی دیار كر ژی كو دایك و باب وی دەمی دێ بنە نمونەیێن باش بۆ زارۆكێ خۆ دەمێ پەیوەندیا وان وەك هەڤالا بیت ل گەل زارۆكێ وان، چونكی ل وی دەمی دێ تێگەهن كا حەز و ئارەزۆیێن زارۆكێن وان چنە و چ ڤالاتیەك هەیە و دێ بۆ پر كەن و گۆت: (ژبەركو پەروەردەكرنا زارۆكی بتنێ خوارن و ڤەخوارن نینە، بەلكو دڤێت ب شێوازەكێ درست و ساخلەم و زانستیانە و ب هەڤرا ئەڤی ئەركێ پیرۆز بجه بینن).
راهێنەرا نێڤ دەولەتی د بوارێ گەشەپێدانا مرۆڤی دا دیار كر ژی، رەفتارێن دایك و بابا كارتێكرنەكا راستەوخۆ ل سەر كەساتیا زارۆكان هەیە، چونكە دایك و باب قوتابخانا ئێكێ نە كو زارۆك تێدا فێری ئەتەكێتێن ژیانێ ببیت و گۆت: (ژبەركو ل دەمێ رەفتارێن دایك و بابان ب شێوازەكێ توندوتیژ بن بێگۆمان رەفتار و كەساتیا زارۆكی ژی دێ ب هەمان شێوە بیت بەروڤاژی هەكە رەفتارێن دایك و بابان ب شێوازەكێ باش و ساخلەم بن دێ كەساتیا زارۆكی ژی ب شێوازەكێ ساخلەم بیت).
ئەڤینێ ئەو چەندە ژی دا زانین كو دڤێت دایك و باب دەمەكی ژ بۆ زارۆكێن خۆ تەرخان بكەن و د ژیانا وان یا رۆژانە دا د هەڤپشك بن، بهێلن زارۆك د سەردەمێ خۆ دا بژین و بلا هەوە ل گەل زارۆكێن خۆ دەركەفتنێن مەیدانی هەبن و لدووڤ داخوازیێن زارۆكێن خۆ بچن و فێر بكەنە وان جۆرە هەلویستان ژی یێن سزا و پاداشت هەبن، دا زارۆك فێری رەفتارێن باش ببیت و ببیتە زارۆكەكێ جوان و ساخلەم د پاشەرۆژێ دا و گۆت: (گرنگە دایك و باب زارۆكێن خۆ فێری رێزگرتنێ و ڤیانێ و راستگۆیێ و پاقژیا ژینگەهێ و نشتیمان پەروەریێ بكەن داكو ل پاشەرۆژێ ئەڤ زارۆكە هەست ب باوەری بخۆ بۆنی بكەت د جڤاكێ دا) .
