پەسەندكرنا پڕۆژە قانوونا حەشدا شەعبی ئانكو دروستكرنا وەزارەتەكا دی یا بەرگریێ
جێگرێ سەرۆكێ لژنەیا ئاسایش و بەرگریێ ل جڤاتا نوونەرێن راگەهاند: دەربازكرنا پڕۆژە قانوونا حەشدا شەعبی ئەستەمە، چونكە پاشی دێ بنە حوكمەتەكا سەربخوە ل ئیراقێ و وەزارەتەكا دی یا بەرگریێ دێ ل ئیراقێ دروست بیت.
سەگڤان سندی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان و جێگرێ سەرۆكێ لژنەیا ئاسایش و بەرگریێ ل جڤاتا ناڤبری گوت» گەلەك كێشە یێن ل سەر پڕۆژە قانوونا حەشدا شەعبی هەین و ئەستەمە بهێتە دەربازكرن، مەترسی ل سەر ئیراقێ هەیە ژ ئەگەرێ وێ چەندێ حوكمەتەك د ناڤ حوكمەتێدا دێ دروست بیت، وەزارەتەكا نوو یا بەرگریێ بەرانبەر وەزارەتا بەرگرییا ئیراقێ دێ دروست بیت».
رۆهنكر ژی» هەكە جڤاتا نوونەران شەرعییەتێ بدەتە حەشدا شەعبی، وی دەمی د شیاندا نابیت بهێتە كونترۆلكرن ژی و ب گۆڕەی قانوونێ كار بكەن، لەوما ئەمریكا و هەڤپەیمان د رازی نینن ل سەر وێ پڕۆژە قانوونێ».
سەگڤان سندی دیاركر ژی» كورد و سوننە دەنگ ل سەر نادەن و شیعە ژی تنێ ئەوێن بەرژەوەندی ل گەل هەین و هێز ژی هەین پشتەڤانیێ لێ دكەن، لەوما د ڤێ خولا جڤاتا نوونەراندا ناهێتە پەسەندكرن، لەوما فشارێن مەزن دهێنە كرن بۆ دەربازكرنا وێ پڕۆژە قانوونێ، ئەو ژی ئەستەمە هەكە لهەڤهاتنا سیاسی ل سەر نەهێتە كرن».
ئەڤە د دەمەكی دایە كو پێشتر ئەمریكا نەرازیبوونا خوە ل دۆر پەسەندكرنا پڕۆژە قانوونا حەشدا شەعبی گەهاندبوو ئیراقێ، چونكە ب دیتنا ئەمریكا ئەو گرۆپێن چەكدار مەترسییەكا رژدن ل سەر دەڤەرێ.
