پەقینا بێ دەنگ
خالد عەلی سلێڤانەیی
دیاری بۆ گیانێ هەمی قوربانیێن بێ گونەهێن سەردەمێ پەقینا پرێمسان
من چو جاران هزر نەدكر كو ئەز دێ رۆژەكێ حەزژێكرنێ كەم، لێ پشتی ئەز ل شەهیانا كورێ خالێ خوە ئامادە بوویم و چاڤێ من ب وێ كچكا وەك پەریان كەتی، وان چاڤێن كەسك وەكی بوهارا و پرچا زەر وەكی زەڤیا كەنمی، چاڤێن مە كەتن ئێك و چاڤێ من ژێ ڤەنەبوو لێ وێ ئاوروویێن شەرمین دان، بۆ ئێكەم جار د ژیانا خودە من هەست كر كو دنیا هند شرینە. هەستەكێ سەیر كر د دلێ مندە، هەمی كێلیكێن من ژ خوە تژی كرن، هەتا من پسیاركری من زانی كو ژ مالباتا خزمێن خالێ منە، من خوە گەهاندێ، نەسرین ل ئێكێ كولیژێ بوو، ب هەر رێكا هەیی من هەستێ خوە بۆ ئاشكراكر و ل بەندا بەرسڤا وێ مام، هەتا كو ل رۆژا چەژنا قوربانی، وەك نهۆ تێت بیرا من، بەرسڤا وێ گەهشتی من، وەسا دیاربوو كو وێ ژی ئەز دڤێم، مە پەیوەندی د گەل ئێك موكوم كرن، رۆژ هات و رۆژ چوون و مە سۆز دا كو ئەم بۆ ئێك بن، لێ بریارا وێ بوو كو ئەز وێ نەخوازم هەتا كۆلیژێ ب دووماهیك نەئینت، وەك ڤێگاڤێ ل بیرا منە ئێڤاریا رۆژا ئەینیێ یە، ئەز داخوازكرم بۆ ژڤانەك گرنگ، هەتا ئەم د گەل ئێك كۆم بووین ومن دیمێ وێ یێ خەمگین دیتی من زانی تشتەك نە خوەش یێ هەی، من ژێ پسیاركر: تە خێرە تو هوسا یا مریتۆ شین؟ گۆت من دڤێت تو ب نێزیكترین دەم بهێی و من ب خوازی..
ـ خێرە ما نە بریارا تەیە كو ئەز تە نەخوازم هەتا تو كۆلیژێ بدووماهیك بهینی؟ هێشتا سالەكا مایی؟
ـ بەلێ، لێ شەڤێدی خوازگینی هاتن من.
ـ چ…كی بوون.
ـ برازایێ لەعلێیا جیرانا مە یێ ژدەرڤەیی وەلاتی و دلێ خوە یێ دایی ل سەر من پشتی جارەكێ ژ دەرڤە هاتی و سەرەدانا لەعلێ كری و ئەز ل وێرێ دیتبووم.
ـ تە چ بریار دا وان؟
ـ من گۆت ئەز شوو ناكم هەتا كۆلیژێ ب دووماهیك نەئینم.
لێ بابێ من یێ رژدە من بدتێ.
نسرینێ وەك زارۆكا بەردا گری و دگۆت: ئەز گۆری تەبم من ببە و نەهێلە من بدن وانا، ئەز بابێ خوە دنیاسیم دێ من فرۆشیت.
ـ سوبەهی دێ مالا مە ل نك وە بن.
بوو رۆژا دی، من مالا خوە فرێكر مالا نسرینێ دا بوو من بخوازن، لێ گۆتن مە یا دایی برازایێ لەعلێیا جیرانا مە… هەمۆ رێك من بكارئینان چو ب دەست منڤە نەهات…بابێ نەسرینێ یێ رژد بوو كو وی بدت برازایێ لەعلێ…دراڤی چاڤێن وی تاركر بوون، كو قەول بوو كێلویەك زێرا بۆ نەسرینێ چێبكت…ژبلی دراڤێ دێ دت بابێ وێ..
مالا برازایێ لەعلێ شریناهییا نەسرینێ بر، ل وی دەمی چو رێك ل بەر نەسرینێ نەمان و پەیوەندیێن من و وێ هاتن بڕین..
هەتا من ل شەڤا پێنج شەمبیێ زانی كو نەسرین چوو بوو د سەرشۆێ ڤە و پرێمس پێڤە پەقی بوو…لێ پاشی من زانی كو نە پرێمس پەقی بوو، بەلكو نەسرینێ گازا پرێمسی ب خوە دكر بوو و خوە سۆت بوو…هوسا خویشكا وێ یا بچویك نەورۆزێ بۆ من گۆت، كو نەسرینێ گۆتبوو خویشكا خوە نەورۆزێ بێژە دادێ ل گەردەنا من ئازا بكەت، وئەز گەلەك حەزژێدكەم و بێژە سەرداری ئەز ئێدی نەشێم سۆزا وی ب پارێزم لەو بۆ من مرن خوەشترە ژ ژیانا نە د گەل وی…ئەز دێ باركەم نەورۆز، بابۆیی زێر و دراڤ ژ من پتر ڤیان، و ئەز ئامادە نینم ببم متایەك بۆ فرۆتنێ، ئەز دشێم خوە د گەل سەرداری بدم رەڤاندێ لێ دێ سەرێ بابۆیی هەتا هەتا دناڤ خەلكێ دە چەمینم، لێ من بریارەكا دی یا دایی كو ئەز سەرێ وی نەچەمینم بەلكو دێ هەستەكێ بۆ پەیداكەم كو هەر رۆژ ئەو بمرت.
و ناما نەسرینێ گەهشت من ب رێكا نەورۆزا خویشكا وێ كو كۆتبوو:
«سەردار، من ئێك دل هەیە و ژ بلی ئێكێ كەس ناچت تێدە، ئەو ژی خودێ حەزكر بوو توبی یێ بچت ددلێ مندە، بابێ من ئەز نەچار كرم من بكەت دناڤبەرا دوو ژێگرتنان دە، ژیان د گەل غەیری تە و مرن، لەو من مرن ژێ گرت، جهێ سەرفەرازییێ یە ئەز جارەكێ بۆ ئەڤینا خوە بمرم نەكو هەر رۆژ د گەل ئێكی ئەز حەزێ نەكەم بمرم. من تو ڤیایی و ئەز راستگۆ بووم د گەل حەزژێكرنا خوە بۆ تە، راستە ئەز دێ مرم بۆ ڤێ ئەڤینێ لێ حەز دكەم تو بژی بۆ ڤێ ئەڤینێ و قەت باوەرنەكە كو ئەم دێ ژێك دوور كەڤن. ئەڤینا مە چو جاران نا یا دو جەستەیان بوو، لەو دێ هەر روحا مە د گەل ئێك بن، حەز ژ تە دكەم، خوەشتڤییا تە یا دلسۆز نەسرین».
نەسرین مر، خوە قوربانی حەزژێكرنا من كر، لێ ئەز مرۆڤەك ترسنۆكم نەوێرم وەك وێ بكەم و ب وێرە بگەهم، ئەز نە هەژی وێ مە…ب تنێ من شیا ناڤێ وێ ل سەر دەستێ خوە دەق بدم…ئاخ نەسرین. خوەزی نەسرین نەمربا.. یان ئەز ژی دگەل خوە بربام.
لێ من ل سەر گۆرێ وێ سۆزا دایی كو ئەز ژنێ پشتی وێ نەئینم…هەتا بمرم… ئەرێ نۆژدار و ئەڤە ئەز بوومە شێست سالی، هۆسا نەخوەش ل سەر ڤی تەختێ نەخوەشخانێ ، لەو من زارۆك و چ كەس وكار نینن بهێن ئەز وەسیەتا دوماهیێ بێژم وانا، ئەڤجا ژ دل من دڤێت بمرم و بگەهم نسرینێ، ب راستی گەلەك ژێ خەیبم.
تژی چاڤێن نۆژداری ژی رۆندك بوون و چاڤێن سەرداری ژی هاتن نەقاندن.
