پەنجەشێرا مەمکی ل دەمێ دوگیانیێ
د. سناء رشید
تایبەتمەندا نەخۆشیێن مەمکی
هەر گرێیەک یان گۆشتەکێ زێدە د مەمکی دا نابیت بهێتە پشتگوھ هاڤێتن، هەتا هەکە تو یا دوگیان ژی بی؛ چونکی ئەگەرێ هندێ هەیە پەنجەشێرا مەمکی بیت.
پەنجەشێرا مەمکی ل دەمێ دوگیانیێ گەلەک یا کێمە، بەلێ یا هەی.
دەستنیشانکرنا وێ د دەمێ دوگیانیێ دا ب رێکا ڤان پشکنینان دبیت:
* پشکنینا کلینیکی (ژ لایێ پزیشکی ڤە).
– سۆنار (Ultrasound).
– وەرگرتنا نموونەیەکێ.
– هەکە پێدڤی کر، پشکنینا “مامۆگرام” دهێتە کرن ب مەرجەکی لەشێ کۆرپەلەی بهێتە پاراستن.
تێبینی: پشکنینێن (CT scan) و (PET scan) ل دەمێ دوگیانیێ قەدەغەنە.
چارەسەری ب چ رەنگە؟
چارەسەری دکەڤیتە سەر عەمرێ دوگیانیێ (کێژ هەیڤە)، قۆناغ و جۆرێ پەنجەشێرێ، و رەوشا گشتی یا دایکێ:
سێ هەیڤێن دەسپێکێ: بتنێ نشتەرگەری یا رێپێدایە. چارەسەریا کیمیاوی و تیشک قەدەغەنە.
سێ هەیڤێن دویێ و سیێ (ژ هەیڤا 4 تا 9): نشتەرگەری یا رێپێدایە، و چارەسەریا کیمیاوی ژی پشتی حەفتیا (14)ێ یا بێ ترسە و دهێتە ئەنجامدان.
* چارەسەریا هۆرمۆنی، تیشک، و دەرمانێن (Anti-HER2): ئەڤە هەمی پشتی زارۆکبوونێ دهێنە دان و ل دەمێ دوگیانیێ قەدەغەنە.
* شیردانا سروشتی: ل دەمێ وەرگرتنا چارەسەریا کیمیاوی یان هۆرمۆنی قەدەغەیە.
کورتیا پەیامێ: دوگیانی نابیتە رێگر ل بەرامبەر چارەسەرکرنا پەنجەشێرا مەمکی.
