پەڕلەمانتارەكا ئیراقێ: ل دەستپێكا سالا بهێت یاسایا بودجەیێ دێ هێتە راستڤەكرن
ئەندامەكا پەڕلەمانێ ئیراقێ ژ فراكسیۆنا پارتی دیموكراتی كوردستان دیار كر، ل دەستپێكا سالا 2024ێ، یاسایا بودجەیا گشتی یا ئیراقێ دێ هێتە راستڤەكرن بۆ هندێ مووچەیێ فەرمانبەرێن هەرێما كوردستانێ ژ مەزاختیێن ڕاستەقینە بهێتە جوداكرن و مووچەیێ فەرمانبەرێن هەرێما كوردستانێ د دەمێ خوە دا بهێتەدان، چونكی د ئەڤ سالە دا حكومەتا ئیراقێ د دەمێ خوە دا مووچەیێ فەرمانبەرێن هەرێما كوردستانێ نەهنارتیە.
نەهلا قادر ئەفەندی، ئەنداما پەڕلەمانێ ئیراقێ ژ فراكسیۆنا پارتی دیموكراتی كوردستان زێدەتر بۆ رۆژناما ئەڤرۆ گۆت: «بزاڤێن رژد دهێنە كرن، كو ب رێیا راستڤەكرنا یاسایا گشتیی یا بودجەیا ئیراقێ، مووچەیێ فەرمانبەرێن هەرێما كوردستانێ ژ مەزاختیێن راستەقینە بهێتە جوداكرن و مووچەیێ فەرمانبەرێن هەرێمێ د دەمێ خوە دا بهێنەدان و ئێدی نەهێنە گیرۆكرن».
گۆتژی: «سالانە ئەم دشێین پشكەكا بڕگەیێن یاسایا بودجەیێ راستڤەكەین و د كۆمبوونێن بهێن یێن پەڕلەمانێ ئیراقێ دا، كو ل دەستپێكا سالا بهێت دێ بێهنڤەدانێن پەڕلەمانێ ئیراقێ دەستپێكەن، پاشی دێ كار ل سەر راستڤەكرنا چەندین بڕگەیێن یاسایا بودجەیێ دێ هێتە كرن».
