پەیام و پەیامبەر
بەهزاد بەهرام
تو هێشتا نەبووی
دەما هەبوون و هەیبەتا تە هەی
تو هێشتا نەبووی
دەما تە ناڤەكێ پیرۆز هەی
لسەر هەبوونا تە
پرسیار لدیڤ پرسیارێ
دئازریان..
شەر دكر ل مەیدانان
ئێك و دو دخوارن، بێ بەرسڤ دمان
نە بەس مرۆڤان
بەلكۆ، ئەرد و ئاسمان
ل هەمی كوژیان، ل كۆلان و رێكان
دناڤ هەمی لاپەرێن پەرتووكان
ل بەرسڤێ دگەران
ل هەبوون و ناڤێ پیرۆزێ تە دگەران
پاشان عەڤرێن گرنژینێ
ل بلنداهیان
گاڤیێن بارانا عەشقەكا نوی باراند
ژ دلۆپ و چبكان، وێنێ بشكورینێ
لسەر سینگێ پان و بەرین نەخشاند
گول و گولزار، باخ و بیستان
دناڤ باخچەیدا خەملاند
دارئالینكان، سلاڤەكا جوانكر
رێزا گوڤەندا خۆ درێژ كر
موزیكژەنا موزیك بۆ دژەنی
سترانبێژا ستران ژێرا دستری
داوەتكەر لێ مشەبوون
سەماكەر ژی لێ زێدەبوون
خودانێن فنجان ددەستاندا هەر لێ هەبوون
لێڤ و زمان تەر بوون
روومەت ژ ماچان زوها نەبوون
ئاشقێن دلا دهەمبێزێدا بوون
هندەك پێ هشیار بوون
هندەك پێ مەست بوون
هندەك ژی پێ سەرخوەش بوون
هندەكێن دی
پێ سەرسام و حێبەتی بوون
هندەك ژی
هەتا نوكە د ژەنگێرا ژەنگیتر بوون.
