پەیسک
بلند محەمەد
من ژێهەل سەحدکرێ، ل بەر من بلنداهیەکا بێ پایان بوو، من وەسا تەخمین دکر ڤێت بفڕم، ببمە ڕۆناهی، ببمە دووکێل دا بگەهمە سەری.
ئەز د دالغەکا سەیر دابووم، من هەست دکر رەخەکێ روویێ من یێ بوویە تەنی، یێ دی ئاخ.
ب وێ دالغێ ڤە، من پێ خوە هاڤێتە پایا ئێکێ، دلێ من ئاوازەک ژەنی و هەورێن ڕەش ل هنداڤی سەرێ من ئاسمان تاری دکر، ل جهێ تەرگ و گژلۆکێ، ڕەشەیێن ژ توخمێ تەنیێ ل دۆر من دبارین و درێکا من دا دبوونە گلواز. ب سەر پایا دویێ کەتم و د کەلەخێ تاریێ سەتمیم. من دگۆتە خوە» دێ چەوا شێم گەهمە گۆپیتکێ، ما ئەڤێن گەهشتینێ ب چ ئاموور چۆینە!».
دەنگێن سەیر دگەهشتنە من، وەکو قێڕی و هەواریان بوون. دەنگێ بای د بولیلکان ڕا فیتی ددان. من خوە ب سەر چ ڤە نەبر. ل سەر پایا دی پێن من لەرزین، ڕەجفیم. لایێ روویێ من یێ ئاخ، ئەز دادکێشام، من خوە گران ددیت. لایێ تەنی رێک ل بەر من تاری و بەرزە دکر، من نەدزانی چیە چێدبت. دەنگێ پشیکەکێ ژ نێزیک پەیسکێ دهات، چەند پایەکێ ب سەر کەتبام، دەنگێ وێ دژوارتر لێدهات، هەروەکو ئاگەهداریا من ژ هەبوونا مەترسیەکێ دکر. هینگێ، لایێ روویێ من یێ ئاخ، دندک دوەراندن و لایێ تەنی بۆ کون و قۆلاچێن تاری ڕادکێشام. دەمێ من چاڤێن خوە ڤەکرین و ل دۆر پەیسکێ زڤڕاندین، ڕەشەیەک دبۆری. ڕەشەیێ کەلەخەکێ ئنتیکەبوو، تۆز ژێ دباری، ئێکجار ترس د گیانێ من دا کرە هەڤالجێمک. دەستێن من ب دارێ پەیسکێ ڤە سست بوون. ئەز ژ روودانەکا ژنشکاڤە ترسیام بهێمە ڕاوەستاندن و سەرێن رێکان ل من قوت ببن.
ب وان دەست و پێن خاڤ و سەرێ گران ڤە، هەتا پایا نیڤێ چۆم، من هەست کر رێک دەشتە و دێ زوو گەهم، ژ نشکەکێڤە ڕەوینەک هات، ئەز حێبەتی بووم. من گۆتە خوە» چەوا ئەڤە ب سەر کەتیە!؟» پێن من سست بوون، من هزرێن خوە د هندێ دا دکرن، بگەهمە سەری و ئەڤ دەهبە دوبارە من ل بنی ئاسێ کەت. من تف کرە دەردۆرێن خوە، هەتا تفا من گەهشتیە بنی و چپپپێن ژ ئاخێ ئینایی، من خوە بەری تفێ پانکری ل بنێ پەیسکێ دیت. روویێ من یێ ئاخ وەریا بوو و یێ تەنی ببوو زۆلۆمات.
ترۆمبێلێن پۆلیسا و ڤێڕاگەهشتنێ ئەز ڤەگوهاست بوومە نەخۆشخانەیێ. سۆندێ سێلانێ ژۆردا قورچ قورچ دەرمان پالددا ناڤ دەمارێن من.
پشتی دەڤەر بێدەنگ بوویی، چ دەنگ و پێژن نە دهاتنە بهیستن، تنێ چک چکا زەمبەلا دەمژمێرێ ژۆر کربوو دەپێ شانۆیەکا کەڕ. گوللەیەکێ ژی شیشا پەنجەرێ سمت بوو و تژی ناڤ مەژیێ من و بنێ ژۆرێ ساچمە و پرتێن شیشەیێ کربوون.
ل جهەکی، مرۆڤێن سپی من ل دۆر خوە دیتن، ب لڤینەکا هێدی و ڤەڕێلهایی بەر ب من دهاتن، من پاشپاشکی ژ لڤینا وان یا زۆمبیایی، خوە ڤەکێشا. ئێک ژ وان گۆتە من» تو ژی قوربانیێ پەیسکێی؟».
ل وێڤەتر، ڕەوینا سەیان دهات و دناڤ تاریێ ڕا من خوە بوهژی عەردی ددیت.
