پەیمانەك د ناڤبەرا من و تە دا
بەشیرا دەروێش
د دەریایا چاڤێن تە دە
كەشتیا من، وندا دبە
ئەز ژی ئاڤژێنیێ نزانم
تو ب خوەدێ كە ئەڤیندارۆ
تو ب خوەدێ كە
نەهێلە كەزیێ هێڤیێ من
نۆقی پێلێ دلێ تە ببن
تو ژ من نە پرسە چما
بچووكم
هزرێن زارۆكتیێ
بەر ب خوە ڤە
من دكشینە
لاندكەك
ژ دارا گویزێ
ل سەر سینگا چیایێ كورمێنج
ب دەستێن هەنەكری
من د هەژی نە
خزێمۆكا ژ دێمێن تاڤێ
ددم هەڤ
ل بەر با دفرینم
سیبەرێ خەونێن ئەشقێ
ل بەر پێلێن خوە نە بە
بەلا هێڤی گەشبن
تو جار سێوی نە مینە
چراكێ بەلا نە مەلوول بە
د شەڤێن تەنێتیێ
و تاری دە ڤێخینە
خەملا بۆتانی
ل سەر شاخێ دارا چنارێ
ل هەر وارگەهێ راخینە
نە باورم
نا
ب ئەڤینەك نەوێرەك
ل وەلاتەكی بن دەست
بەر ئاڤێتی نە بە
خاتر خوەستن ب من
گەلەك زۆرن
كەلا گری
من ژ لاشێ من دەرتینە
سۆر سۆر دبە
سەروەیا شەفەقێ
بێ سنوور
خەونان ل دۆرا من
د گرینە
دەم نە هاتیە
نا..
هێژ ئەز بچووكم
دەست ژ من بەردە
مینا پەرپەریكا
ب ئاگرێ ئەڤینا خوە
من نە سۆتینە
هێژ بچووكم
ئێش و دەردان ل من
نە جڤینە
هێژ بچووكم
دەرد و خەما ل من
نە جڤینە.
