پەیوەندیێن رۆســیا و تورکیا ئالــۆز دبن
بسپۆرەکێ کاروبارێن سیاسی دیار دکەت، نها پەیوەندیێن تورکیا و رۆسیا د باش نینن، چونکی رۆسیا بەری سەرێ سالێ داخواز ژ تورکیا کربوو ژ بۆ نەهێلانا کاریگەریا سزایێن ئەمریکا و وەلاتێن رۆژئاڤایی هاریکاریا وێ بکەت و تورکیا ژی داخوازا رۆسیا رەتکر و نها پەیوەندیێن هەر دو وەلاتان ئالۆزتر بووینە.
فەهیم تاشتەکین بسپۆرێ کاروبارێن سیاسی دیار کر، بەری سەرێ سالێ رۆسیا ب فەرمی داخواز ژ تورکیا کربوو هاریکاریا وی وەلاتی بکەت دا رۆسیا بشێت پتر خوە ژ کاریگەریا سزایێن ئابووری یێن وەلاتێن رۆژئاڤایی و ئەمریکا قورتال بکەت، لێ تورکیا د رەوشا نها دا بەرهەڤ نینە هاریکاریا رۆسیا بکەت، چونکی تورکیا وەسا دبینیت نها دەم یێ هاتی پەیوەندیێن خوە ل گەل ئۆرۆپا و ئەمریکا باش بکەت، ئەو یەک ژی بوویە جهێ دلگرانیا بەرپرسێن رۆسیا، د رەوشا نها دا پەیوەندیێن تورکیا و رۆسیا خرابن و رەنگە خرابتر ژی ببن، چونکی نها شەرێ د ناڤبەرا رۆسیا و ئۆکرانیایێ دا دژارتر دبیت و رۆسیا ژی دڤێت تورکیا ل هەمبەر رەوشا نها هەلوەستەک زەلال هەبیت و تورکیا ژی بەرهەڤ نینە خوە بکەتە ئالیەکێ شەڕی یان ژی پەیوەندیێن خوە ل گەل وەلاتێن رۆژئاڤایی ئالۆز بکەت.
ناڤهاتی ئەو یەک ژی دیار کریە، تورکیا دڤێت پەیوەندیێن خوە ل گەل وەلاتێن عەرەبی باش بکەت و د هەمان دەمی دا تورکیا باش دزانیت دڤێت خوە ژ ئەمریکا و وەلاتێن ئێکەتیا ئۆرۆپا ژی دوور نەکەت، چونکی نها تورکیا د قەیرانەکا گەلەک مەزن یا ئابووری دایە، رۆژ ب رۆژێ پتر لیرێ تورکیا ل هەمبەر دۆلاری و پارێن دی بهایێ خوە ژ دەست ددەت و ژ بەر ڤێ یەکێ ژی تورکیا نەشێت د رەوشا نها یا ئالۆز دا داخوازیێن رۆسیا قەبوول بکەت، ئەو یەک ژی دشێت تورکیا تووشی قەیرانەکا نوو بکەت، لێ هەلوەستێ تورکیا دشێت ببیتە ئەگەرێ ڤێ یەکێ ئەمریکا و وەلاتێن ئێکەتیا ئۆرۆپا پێشوازیێ ل سیاسەتا نوو یا تورکیا ل هەمبەر رۆسیا بکەن، لێ د هەمان دەمی دا تورکیا نەشێت خوە ب تەمامی ژی ژ رۆسیا دوور بکەت، چونکی ئەو یەک دێ ئەنجامێن خوە یێن گەلەک خراب بۆ تورکیا هەبن.
ئەو یەک د دەمەکێ دایە، کو بەری دەمەکێ وەزارەتا دەرڤە یا رۆسیا ژی د داخۆیانیەکێ دا سەبارەت ب هەلوەستێ تورکیا دیار کربوو، ئەو تێدگەهن تورکیا ژی د هندەک خالان دا یا مافدارە لێ ئەو یەک رامانا هندێ نادەت تورکیا ب هەلوەستێ خوە ببیتە ئەگەرێ ڤێ یەکێ رۆسیا پتر تەنگاڤ ببیت، چونکی رۆسیا دڤێت پەیوەندیێن گەلەک باش ل گەل تورکیا هەبن و هەکە تورکیا ژی بڤێت پەیوەندیێن خوە ل گەل رۆسیا باش بکەت دڤێت د هندەک خالان دا هەلوەستێ خوە زەلال بکەت.
