پەیڤا بنەمالا ئەنوەر تۆڤی ژ لایێ مامۆستا موسەدق تۆڤی ڤە هاتە خواندن
«ئەم ب ناڤێ بنەمالا مامۆستا ئەنوەر تۆڤی، بخێرهاتنا ئێك ب ئێك ئامادەبوویان دكەین، ژیانا ئەنوەر تۆڤی داستانەك بوو ژ بامەرنێ هەتا پیچنجوین وسلێمانیێ و بەغدا دەستپێكریە و دیسا ڤەگەریایە سلێمانیێ و ژیانا وی ل سلێمانیێ ب داوی هاتیە.
مامۆستا ئەنوەر تۆڤی ل سالا 1925ێ هاتیە سەر دونیایێ، تشتێ گرنگ د ژیانا ئەنوەر تۆڤی دا هەردەم پیشەنگێ شانۆ و شێوەكاری بوویە، یان ژی ژ پێشەنگان بوویە، شانازیە بۆ مامۆستا ئەنوەر تۆڤی كو ئێك چالاكیا هونەری ل وی سەردەمی ل سلێمانیێ نەهاتیە كرن هەكە شوین تبلێن وی تێدا نەبن، چالاكیەكا هونەرمەندێن سلێمانیێ نەچوویە بەغدا و باژێرێن دی یێن ئیراقی یان دەرڤەی ئیراقی، ئەگەر ئەنوەر تۆڤی پشكداری تێدا نەكریت، شانازیە بۆ مامۆستا ئەنوەر تۆڤی ل سالا 1957 ئێكەمین جار شانۆگەریا مەم و زینا ئەحمەدێ خانی ئینایە سەر دەپێ شانۆیێ.
ل سالا 1957 ئێك ژ لاوێن سلێمانیێ بوویە پشكداری د كۆنگرێ لاوان ل ڤییەنا كری، ل سالا 1973ێ پشكداری د كۆنگرێ لاوان ل بەلین دا كر. مامۆستا ئەنوەر تۆڤی هەردەم هونەرمەندەكێ خودان هەلویست بوویە، هێشتا ل دەستپێكا هەلگیرسانا ئاگرێ شۆرەشا ئەیلولێ هاتبوو دەستەسەركرن و زیندانكرن و نەفیكرن بۆ كۆت و هەتا سالا 1969 زۆربەی ژیانا خوە ل نەفیكرنێ دەربازكریە و پشتی 11 ئادارێ دووبارە كەفتیە د خزمەتا دوزا نەتەوەیا كوردی دا.
