پەیڤدارێ وەزارەتا ساخلەمیێ: ئەڤ سالە ئەنفلوەنزا نەگەهشتیە قووناغێن مەترسیدار
هەولێر، قائید میرۆ:
پەیڤدارێ وەزارەتا ساخلەمیێ ئاشكرا كر، ئەنفلوەنزا ئەڤ سالە، ل ڤێ دووماهیێ دژوار بوویە، بەلێ چو مەترسی نینن و هەتا نوكە ژی چو كەسان ژ ئەگەرێ پەرسیڤێ د ئەڤ سالە دا گیانێ خوە ژ دەست نەدایە.
دكتۆر سەركار سوورچی، پەیڤدارێ وەزارەتا ساخلەمیێ بۆ رۆژناما ئەڤرۆ دیار كر، هەر سال د دەمێ گوهۆڕینا وەرزان دا كۆخك و پەرسیڤ د ناڤا وەلاتیان دا بەلاڤ دبن و گۆت: “پێدڤیە د دەمێ توندبوونا نیشانێن كۆخك و پەرسیڤی دا وەلاتی سەرەدانا نەخۆشخانێ بكەن بۆ وەرگرتنا چارەسەریان، ئەڤ سالە پەرسیڤ نەگەهشتیە قووناغێن مەترسیدار، بەلێ ل سنوورێ پارێزگەها سلێمانیێ د چەند رۆژێن بۆری دا هندەك دژوارتر لێهاتیە”.
دكتۆر سەركار سوورچی گۆتژی: “نڤاندن هەبووینە ژ ئەگەرێ دژواریا پەرسیڤێ ئەڤ سالە، بەلێ هەتا نوكە چو حالەتێن مرنێ نەهاتینە تۆماركرن، راستە دو وەلاتیێن دانعەمر ل نەخۆشخانەیێن سلێمانیێ گیانێ خوە ژ دەست دایە و كۆخك و پەرسیڤ هەبووینە، بەلێ ئەگەرێ مرنا وان پەرسیڤ نەبوویە، چونكی نەخۆشیێن دۆمدرێژ هەبووینە و دانعەمربوون، لەوڕا وەلاتیان پشتڕاست دكەین پەرسیڤێ ئەڤ سالە نەگەهشتیە قووناغێن مەترسیدار و وەزارەتا ساخلەمیێ بەردەوام چاڤدێریا رەوشێ دكەت”.
