پەیڤدارێ حوكمەتا ئیراقێ: سۆدانی داخوازكر ئێكسەر كار ب راستڤەكرنا قانوونا بودجەی بهێتە كرن
پەیڤدارێ حوكمەتا ئیراقێ راگەهاند: محەمەد شیاع سۆدانی، سەرۆك وەزیرێن ئیراقێ داخواز ژ حوكمەتا هەرێما كوردستانێ و دەزگەهێن وێ یێن پەیوەندیدار و وەزارەتا پەترۆلا فیدرالی كر ئێكسەر كاری ب راستڤەكرنا قانوونا بودجەی بكەن، ب مەبەستا وەبەرئێنانێ د سامانێن سرۆشتیدا ب تایبەتی سامانێ پەترۆلێ، هەروەسا دیاركر: بلا ئەڤ سامانە ببیتە هۆكارەك بۆ پشتەڤانیكرنا سەقامگیریێ و وەكو هاندەرەك بۆ زێدەتر بجهئینانا پلان و بەرنامەیان بۆ دەستەبەركرنا پێدڤیێن گەلێ ئیراقێ.
باسم ئەلعەوادی، پەیڤدارێ حوكمەتا ئیراقێ گۆت» سەرۆك وەزیران پێنگاڤێن پڕ ژ بەرپرسیارەتیێ یێن جڤاتا نوونەران ب دەنگدانێ ل سەر راستڤەكرنا قانوونا یۆدجەیا گشتییا فیدرالی بۆ سالێن 2023، 2024، 2025 و قانوونا هەژمار 13 یا سالا 2023 ب گۆڕەی وی دەقێ كو ژ جڤاتا وەزیران هاتییە هنارتن، بلند د هەلسەنگینیت».
سەرۆك وەزیرێن ئیراقێ سوپاسییا سەرۆكێ جڤاتا نوونەران و هەردو جێگرێن و فراكسیۆنان كر بەرامبەر تێكگەهشتنا وان و پشتەڤانییا وان ل بۆچوونا حوكمەتێ، هەروەسا دیاركر: ئەو راستڤەكرنە دێ رەنگڤەدانێ ل سەر هەماهەنگییا د ناڤبەرا حوكمەتێ و جڤاتا نوونەران كەت بۆ بەردەوامییا كارێ هەڤپشك ژ پێخەمەت بەردەوامیدانێ ب كاروانێ ئاڤەدانیێ و گەشەپێدانێ.
