پەیڤ و گازی و هیڤی
رەمەزان ئیسماعیل گەرەگوهی
پەیڤێن من …
بۆ ڕوومەتا بەرخوەدانێ و
سەرێ بلندێ كۆبانێ و
بۆ ئازادییا نفشێ بهێت
ل سەرانسەری كوردستانێ
هەمی پەرتووك و خامەنە و
ژ هزر و بیرێن من دپەشن
دبنە سەدەم
هزار زارۆ
دهمبێزا دەیكێن خوەدا
ل سوبەها پێ دبشكوڕن
گازییێن من…
ژ دەنگڤــەدانا
دەنگێ خانی و
مەم و زینێ و نووبهارێ و
شەرەفنامە یا بەدلیسی
بێهنڤەدان و هەناسەنە
بۆ ئێتیم و بەرەبابێن
ب نەخۆشی و پەریشانی
ب بێ خودانی
ل مەرگەسات وئەنفالێن ڕەش
پێ مەزن و پەیاور بووین
بۆ جیهان و
ئاسۆیەكا پتر ئارام
بۆ شێنییێن مینا وانا
بەر ب ئەسمانێ ڕاستیێ
پەڕێن خوە لێكددەن ودفڕن
هیڤیێن من…
ژ ڤەڕێژا
وێ خەباتا ل گوند و چیا و
ڕۆناهییا
وێ كولینا ل هنداڤ سەرێ
زیندانیا و تەڤ گرتیا و
ڤەدیتن و گەهەشتنا
حەز و ئومێد و خۆشییا
هەمی فند و خەتیرەنە
بهایێ وان
تیڕۆژكێن گەش
قەرەبوویا ڕۆژێن نەخوەش
جارەكادی
هەمی ئارمانج پێ دزڤڕن.
