پەیکەرەک بۆ ھونەرمەندەکێ دھۆکێ ل سلێمانیێ ھاتە دانان
ئەڤرۆ، سالار دۆسکی:
ب ھەلکەفتا رۆژا جیھانی یا شانۆیێ پەردە ل سەر پەیکەرێ ھونەرمەندێ شانۆڤان د. غازی بامەرنی ل بەر دەرگەھێ رێڤەبەریا چالاکیێن قواتابخانا ل باژێرێ سلێمانیێ ھاتە لادان و ھونەرمەند نیاز نوری نەقیبێ سەندیکا ھونەرمەندێن کوردستانێ بۆ ئەڤرۆ گۆت: وەک وەفایەک ھەمبەر خزمەتا وی بۆ باژێرێ سلێمانیێ کری، کو رەحمەتی غازی بامەرنی ل سالێن حەفتێیان پشتی دەرچوونێ قەستا وی باژێری کربوو و ژ دامەزرێنەرێن شانۆیا نوو بوو، مە ھزر ل دانانا پەیکەرێ وی کر، ب سپونسەری یا کومەلگەھا پەروەریی یا مارگێرێت ئەڤ کارە ھاتە ئەنجامدان و ھونەرمەندێ پەیکەر ساز عومەر جەمال ب کارێ چێکرنا پەیکەرێ وی رابوو.
د. غازی بامەرنی ژدایکبوویێ سالا ١٩٤٢ یە، ل بامەرنێ خواندنا سەرەتایی و ئامادەیی ل بامەرنێ و ئامێدیێ ب دووماھی ئینایە، کولیژا ھونەری ل بەغدا ماوێ چەند سالان ل سلێمانیێ ژیایە، ژ دامەزرێنەرێن شانۆیا نو بوویە، ماوێ چەندین سالان ل دەرڤە بوویە، ماوێ چەند سالان مامۆستایێ پشکا شانۆیێ ل کولیژا ئادابێ ل زانکۆیا دھۆکێ بوو، ل رۆژا ١٥/١٢/٢٠٢٠ ل دەرڤە وەلاتی ب نەخۆشیا کۆرۆنایێ وەغەرکریە و ل سەر وەسیەتا وی ل بامەرنێ ھاتیە ڤەشارتن
