پەیەدە ل رۆژئاڤا خزمەتا پرۆژێ رژێما سووریێ دکەت
ئەڤرۆ نیوز:
ماموستایەکێ زانکۆیێ ل دۆر سوتنا ئالایێ کوردستانێ ژ ئالیێ پەیەدێ ڤە دیار دکەت کو سیاسەتا پەیەدێ ل رۆژئاڤا خزمەتا پرۆژێ بەرتەنگێ حزبی و سیاسەتا پەکەکێ یا ھەرێمی دکەت، کو د چارچۆڤێ ناکوکیا ھەرێمی دناڤا دەولەتێن جۆدا جۆدا دا و ئەڤ پرۆژە خزمەتا گەلێ کورد و کێشەیا کوردی ل رۆژئاڤا ناکەت.
زێرەڤان بەرواری ئەو ماموستایێ زانکۆیێ یە سەبارەت سوتنا ئالایێ کوردستانێ ژلایێ پەیەدێ ڤە ل رۆژئاڤا بۆ رۆژناما ئەڤرۆ دبێژیت: سیاسەتا پەیەدێ ل رۆژئاڤا خزمەتا پرۆژێ بەرتەنگێ حزبی و سیاسەتا پەکەکێ یا ھەرێمی دکەت، کو د چارچۆڤێ ناکوکیا ھەرێمی دناڤا دەولەتێن جۆدا جۆدا دا کو ئەڤ پرۆژە خزمەتا گەلێ کورد و کێشەیا کوردی ل رۆژئاڤا ناکەت و زێدەتر خزمەتا پرۆژێ سووریێ دکەت، کو ئەو پرۆژە ھەر دەمەکی دبیت کارتا کوردی بکەتە قوربان بۆ بدەستڤە ئینانا بەرژەوەندێن خوە بتایبەتی ل گەل دەولەتێن زلھێز و ھەرێمی.
ماموستایێ زانکۆیێ د بەردەوامیا ئاخڤتنا خوە دا ئەو یەک ژی دیار کر کو سوتاندنا ئالایێ کوردستانێ رامانا ھەڤرکیا سیاسیە ل گەل پرۆژێ پارتی، کو مخابنی ھەتا کو نوکە سەرەدەریا حزبی ل گەل ئالایێ کوردستانێ دھێتە کرن، بێی کو رێز ل شەرعیەتا باشوورێ کوردستانێ بھێتە گرتن، ھەروەسا نەبوونا ئستراتیجیەتا کوردی یە د چارچۆڤێ ھەرێمی دا، ناڤھاتی زێدەتر دبێژیت:فەلسەفەیا حوکومرانیا پەیەدێ ل سەر شەنگستێ توتالیتاری و نە خواندنا بەرامبەری ھاتیە رێکخستن و لەورا ب ڤان رەفتارا پەیەدە ھەول ددەت ب میکانیزما ھێزێ خوە ب سەپینیت و شەرعیەتا ھێزێ بکەتە چارچۆڤە بۆ سیاسەتکرنێ ل رۆژئاڤا، لێ گەلەک یا گرنگە پەیەدە دان ب ژیوارێ سیاسی ل رۆژئاڤا بکەت و پارتێن دی د بریارا سیاسی دا پشکدار بکەت و رێک ل ئازادیێن گشتی بھێتە ڤەکرن، چونکی رۆژئاڤا ب سیاسەتا پەیەدێ بەرەف مەترسیا ژناڤچوونێ دچیت و یاری پێکرن ب کیشەیا کوردی ل وێ دەڤەرێ و بتایبەتی ل ژێر ھەبوونا ھێرشێن ناڤخوەیی و دەرەکی ل سەر ئەزموونا رۆژئاڤا ھەیە.
دەربارەی ھەلویستێ تورکی ھەمبەری رۆژئاڤا ناڤھاتی دیارکر کو تورکیا سیاسەتەکا تایبەت بەرامبەری کوردێن رۆژئاڤا ھەیە، کو د چارچۆڤێ سەرەدەریا ل گەل پەکەکێ دا خوە دبینیت، ئەڤ سیاسەتە ب ھەلویستێن پەیەدێ ل گەل پارتێن کوردی ناھێتە گوھۆرین، ھەروەسا تورکیا پەیەدێ ب کارتەکا گڤاشتنا لەشکەریا سیاسی یا پەکەکێ دزانیت و سیاسەتا ھشک ل گەل رۆژئاڤا پەیرەو دکەت، ژ پێخەمەت لاوازکرنا پەکەکێ و ھەروەسا لاوازکرنا پرۆژێ بەشار ئەسەدی کو تورکیا ب ھێلا سۆر دزانیت ل سەر بەرژەوەندیێن خوە و گۆت: (لەورا بەردەوامبوونا پەیەدێ ل سەر پێشێلکرنا مافێن گشتی و بەرفرەھبوونا بازنێ نەرازیبوونێ و زێدەکرنا دوژمنان بۆ کوردێن رۆژئاڤا دێ رەوشا وی پارچێ کوردستانێ خرابتر کەت و دڤێت رێگری ل کریارێن پەیەدێ بھێتە کرن).
زێرەڤانی ئەو یەک ژی نەڤەشارت کو تورکیا رازی نابیت ب ھەژموونا پەیەدێ و نەبوونا چ پرۆژێن دی ل گەل پەیەدێ ئاراستەیا سیاسی ل رۆژئاڤا ب زەحمەت دکەڤیت و ب ڤێ چەندێ پەیەدە رێیا دەستێوەردانا ھەرێمی زێدەتر لێ دکەت د کاروبارێن کوردێن رۆژئاڤا دا.
