پ.د. ئیبراهیم ئه‌حمه‌د سمۆ: نابیت مامۆستا ل 63 سالیێ بهێنه خانه‌نشینكرن
ئه‌ڤرۆ، سالار محه‌مه‌د دۆسكی:
سه‌رۆكێ لژنا په‌روه‌ردێ و خوێندنا بالا ل خولا چارێ یا په‌له‌مانێ كوردستانێ داخاز دكه‌ت سیسته‌مێ خواندنێ ل كوردستانێ بهێته راستڤه‌كرن و گرنگیا وه‌زاره‌تا په‌روه‌ردێ ژ وه‌زاره‌تێن بازرگانی و سامانێن سرۆشتی گرنگتر بیت و گۆت: وه‌زاره‌تا په‌ره‌ردێ بڕبڕا پشتێ یه و داخاز دكه‌م بهێنه ده‌نگ و ببنه خالا فشارێ بۆ باشتركرنا ره‌وشا زانینێ ل كوردستانێ.
پ.د. ئیبراهیم ئه‌حمه‌د سمۆ، سه‌رۆكێ لژنا په‌روه‌ردێ و خوێندنا بالا ل خولا چارێ یا په‌رله‌مانێ كوردستانێ بۆ رۆژناما ئه‌ڤرۆ گۆت: پێشتر بریاره‌ك هه‌بوو كو هه‌ر ده‌رچوویه‌كێ پولا نه‌هێ پشتی سێ سالان ژ ده‌رچوونێ وی ماف هه‌یه پولا 12 پێشكێش بكه‌ت و تاقیكرنا بكه‌ت و ئه‌ڤه ژی گه‌له‌ك د به‌رژوه‌ندا په‌روه‌ردێ دا بوو و كێمتر مه‌زاختی دهاته‌كرن و به‌رۆڤاژی پشتی ئه‌ڤ سیسته‌مه نه‌مای زێده‌تر مه‌زاختی دهێته مه‌زاختن كو دڤێت پولێن چار و پێنجێ و شه‌شێ ئاماده‌یی بخوینیت.
پ. د. ئیبراهیم ئه‌حمه‌د سمۆ، سه‌رۆكێ لژنا په‌روه‌ردێ و خوێندنا بالا ل خولا چارێ، ل دور سیسته‌مێ هه‌لبژارتنان ل قوناغا دوازدێ گۆت: هه‌كه تو قوتابیه‌كێ گه‌له‌ك زیره‌ك بی دێ هه‌لبژارتنێن دروست هه‌لبژاێری و دێ گه‌له‌ك یا ب ساناهی بیت، هه‌كه قوتابیه‌كێ گه‌له‌ك لاواز بی، ره‌نگه شانسێ وی رولێ خوه بینت و ده‌ربازببیت، ده‌مێ دچیته زانكۆیێ دێ ئاستێ وی یێ نڤێسینێ هه‌ر چ نه‌بیت و زانكۆ جهێ خواندنێ یه، به‌لێ ب رێژا 25% خواندنه و 75% ل سه‌ر سمینار و چالاكیێن ده‌رڤه یه و فیسته‌ڤالا و گه‌شتێن زانستی یه و به‌رۆڤاژی سیسته‌مێ په‌روه‌ردێ دڤێت 75% خواندن بیت و 25% چالاكی و وورك شووپ و بزاڤ بن، سیسته‌مێ هه‌لبژارتنان ب گشتی چه‌ند ساله یێ له‌نگه، ئه‌ڤه ژ لایه‌كی ڤه و ژلایه‌كێ دی ڤه كارتێكرنا سوشیال میدیایێ و جیله‌كێ دروست بووی ب رۆژ نڤستی نه و ب شه‌ڤ دهشیارن، به‌روڤاژی وه‌لاتێن ئه‌وروپا ل ده‌مژمێر 10 هه‌موو دنڤستی نه و دیسا پتریا مامۆستان ژی ب رۆژ د نڤستی نه و ب شه‌ڤ دهشیارن و ڤێ چه‌ندێ كارتێكرنه‌كا مه‌زن ل سه‌ر مامۆستا و قوتابیان هه‌یه، دڤێت كومبوونه‌كا بله‌ز بهێـته‌كرن و پلانه‌كا درێژخایه‌ن بهێته‌دانان و هه‌كه سیسته‌مێ هه‌لبژارتنان نه راكه‌ن ژی هه‌ر چ نه‌بیت بلا 50% نڤێسین بیت و 50% بلا هه‌لبژارتن بن دا ئه‌و قوتابی بشێت شیانێن نڤێسینێ هه‌بن.
راوێژكارێ زانكۆیێن جیهان زێده‌تر گۆت: شه‌رم نینه هه‌كه بزڤرینه سیسته‌مێ خواندنێ یێ جاران و ئه‌ڤ سیسته‌مه نه‌یێ رژێما عیراقێ یه وه‌ك خه‌لك هزر بۆ دكه‌ت، ئه‌ڤه سیسته‌مێ دروستبوونا ده‌وله‌تا عیراقێ یه ل سالا 1921ێ یه و ئه‌ڤه سیسته‌مه‌كێ سه‌ركه‌فتی بوو.
د. ئیبراهیم ئه‌حمه‌د سمۆ، سه‌رۆكێ لژنا په‌روه‌ردێ و خوێندنا بالا ل خولا چارێ گۆت: گرنگه سیسته‌مێ ویزاری بۆ پولا شه‌شێ و نه‌هێ و 12 و ڤه‌گه‌ریت و ته‌مهیدی بۆ قوتابیێن پشتی سێ سالا ژ نه‌هێ ده‌رچووی ماف هه‌بیت 12 تاقیكرنا بكه‌ت و دڤێـت رێك بهێنه خوشكرن.
راوێژكارێ زانكۆیێن جیهان، پ.د. ئیبراهیم ئه‌حمه‌د سمۆ گۆت: گرنگه راستڤه‌كرن د خانه‌نشینكرنا مامۆستان دا بهێـته‌كرن و مامۆستا ل 63 سالیێ ناهێته خانه‌نشینكرن، به‌لكو وه‌ك دادوه‌را ل 70 سالیێ بهێنه خانه‌نشینكرن چونكه مه پێگوهورێن وان نینن، ئایا پێگوهورێن وان ئه‌مین ئه‌ڤێن ژ هه‌لبژارتنان ب سه‌ركه‌فتین؟ چ ژێ نه‌چوویه نیڤا رێ ژی بزڤرین باشی یه و تایبه‌ت سه‌رپه‌رشتیار زووی نه‌هێنه خانه‌نشینكرن، نابیت خانه‌نشینكرنا مامۆستا و فه‌رمانبه‌ره‌كێ نورمال وه‌ك ئێك بیت، پێ گوهورێ فه‌رمانبه‌ری دێ هه‌بیت، به‌لێ پێ گوهورێ مامۆستای نینه.
ل دووماهیێ پ.د. ئیبراهیم ئه‌حمه سمۆ، خواست كاغه‌زا سومو نه‌مینت و پولا شه‌شێ و سیێ ناڤنجی و 12 وه‌ك پێشتر ویزاری بیت و هه‌لبژارتن نه‌مینن دا قوتابی بۆ زانكۆیێ بهێته به‌رهه‌فكرن و گۆت: وه‌زاره‌تا په‌روه‌ردێ گه‌له‌ك ژ وه‌زاره‌تا سامانێن سرۆشتی گرنكتره، بلا خه‌ما مه هه‌میان بیت، وه‌زاره‌تا په‌ره‌ردێ بڕبڕا پشتێ یه و داخاز دكه‌م بهێنه ده‌نگ و ببنه خالا فشارێ بۆ باشتركرنا ره‌وشا زانینێ ل كوردستانێ.
