چارشەمبیا سۆر كەڤنترین جەژنا ئێزدیانە
دلڤین رەشید:
بەرپرسێ راگەهاندنا پەرستگەها لالش بو روژناما ئەڤرۆ دیار كر كو جەژنا سەرێ سالێ كەڤنترین جەژنا ئێزدیانە دكەڤیتە چارشەمبیا ئێكێ ژ هەیڤا نیسانێ یا رۆژهەلاتی و گۆت: كەڤناتیا وێ دزفریتە دەسپێكا ئافراندنا كنیاتی، دەمێ پادشایی دور ژ نورا خوە ئافراندنێ و ئاخ و ئاڤ و با و ئاگر ژێ پەیدا كرین.
لوقمان سلێمان بەرپرسێ راگەهاندا پەرستگەها لالش بۆ رۆژناما ئەڤرۆ دیار كر، ئەڤ جەژنە دەستپێكا سالا نوویە، هەر ژ كەڤندا مللەتێن ئاری ل رۆژهەلاتا ناڤین ب شێوەیەكێ گشتی و ل وەلاتێ میزوپوتامیا ب شێوەیەكێ تایبەت پێشوازی ل سالا نوو دكرن و جەژن و ئاهەنگێن جورا و جۆر بڤێ هەلكەفتێ د گێران و ڤەكولینان دایە دیار كرن كۆ پەیڤا نیسان ژ پەیڤا نووزان یان سالا نوو هاتیە.
بەرپرسێ راگەهاندا پەرستگەها لالش دیار كر ژی، ئێزدی رێز و بەها و پیرۆزیێ ددەنە ڤێ هەیڤێ ژ بەر هندێ ژی د ڤێ هەیڤێ دا ژنان نا ڤەگوهێزن و دبێژن گونەهە و گۆت: (چونكی نیسان بخوە بوكا سالێ یە ب جوانترین رەنگ یا خەملیە و چ بۆكا د سەر خۆرا قەبول ناكەت و گرنگی دانا ئێزدیان ب سرۆشتی ژ بۆ پاراستنا گژ و گیایی و هەموو ڕوەكا و ئەڤ هەیڤە دەمێ ڤەژین و بۆژاندنا هەموو گیاندارایە).
لوقمان ئەو چەندە ژی دیار كر كو رێو رەسمێن جەژنا چارشەمبیا سۆر ل دەستپێكێ ل ئێڤاریا جەژنێ ل پەرستگەها پیرۆزا لالش فتیل و چرایا ل سووكا مەعریفەتێ و ل بەر نیشانگەهێن خاس و چاكا هەلدكەن، هەر كەسەكی ئامادە دڤێت پشكداریێ د ڤێ رێو رەسمێ دا بكەت، دیندار و قەول زان قەول و بەیتا رێز دكەن و سەما ژی دهێتە كرن زارۆك و گەنج قەستا ئاقارێ گوندی دكەن و كولیلكێن نیسانێ و بێناڤێ دئینن، كابانیا مالێ هێكا رەنگا و رەنگ دكەت و سەوكا د پێژیت وەك خێر ل سەر دەر و جیرانا دا بەلاڤ دكەت.
لوقمان د بەردەوامیا ئاخفتنێن خۆدا گۆت: (هەموو ئێزدی خۆ پاقژ دكەن و جلكێن نوو ل بەر خۆ دكەن ژ بۆ پێشوازیا سالا نوو ئانكو جەژنا چارشەمبویا سۆر زەلام ب هەڤرا قەستا نیشانگەهێن خاسێن گوندی دكەن و زیارەتی دبن و ل دووڤ پێچێبونا خوە هەر مالەك سەربرەكی دكەتە خێر و هەر مالەك چرایێ خۆدانێ مالێ هەلدكەت).
بەرپرسێ راگەهاندا پەرستگەها لالش دا زانین ژی كو پێدڤیە ل رۆژا سبەیكا جەژنێ هەر ئێزدیەك بەری رۆژ هەلاتێ دەست و چاڤێ خوە ب خوناڤێ جوان كەت و ل گەل رۆژهەلاتێ كابانیا مالێ قەفتەكا كولیكێن نیسانێ و گیایێ بێناڤێ ل گەل قالكێن هێكێن رەنگا و رەنگ ب هەڤیری یان بەرێ ب هەڕی ب سەر دەرێ مال و خانیا ڤەكەن و ل دەمێ تێشتێ هەر مالەكا پەز هەی ماستی ب سەر دەر و جیرانان بەلاڤ كەن و ئەو مالا ماست بۆ دچیت هندەك هێكا ددەتە وی كەسێ ماست بۆ بری وەكی خەلاتێ وی و گۆت: (پشتی هنگی زاروك و گەنج و زەلام مال ب مال دگەڕن و جەژنا ئێكدوو پیرۆز دكەن و د ڤێ جەژنێ دا چەندین یاریێن جودا دهێنە كرن ئێك ژ وان یاریا هێكانێ یە) .
