چاره‌سه‌ركاره‌كێ ده‌روونی:نه‌خوشیا شیزوفرینیایێ گوپیتكا تێكچوونا ده‌روونیه
ئه‌ڤرۆ، شه‌هلایا رێكانی:
چاره‌سه‌ركاره‌كێ نه‌خوشیێن ده‌روونی دیار كر كو شیزوفرینیا تێكچوونه‌كا مێشكی و ده‌روونیه، ره‌وشه‌كه كو كه‌سێن توشبوویی ب ڤێ نه‌خوشیێ ده‌وروبه‌رێن خوه و كه‌توارێ خوه ب ره‌نگه‌كێ نه درست شروڤه دكه‌ن و گۆت: تووشی هه‌لوه‌سا و گومانێن دژوار دبن و نه‌شێن كاروبار و چالاكیێن روژانه ب درستاهی ب رێڤه ببه‌ن، یان هنده‌ك ژ وان ب تمامی ژ كار دكه‌ڤن.
سه‌باره‌ت چاوانیا سه‌ره‌ده‌ریێ ل گه‌ل نه‌خوشێن شیزوفرینیایێ چاره‌سه‌ركارێ ده‌روونی شێروان عه‌بدولستار دیار كر كو پێدڤیه ده‌وروبه‌ر و ئه‌ندامێن خێزانێ و جڤاك سه‌ره‌ده‌ریه‌كا ساخله‌م ل گه‌ل كه‌سێن تووشی نه‌خوشیا شیزوفرینیایێ بوین بكه‌ن و هاریكاری و پشته‌ڤانیا وان بكه‌ن و گۆت: (هه‌رده‌م په‌یڤ و رستێن ئه‌رێنی بێژنه وان، بزانن ئه‌ڤه تێكچوونه و نه ب وانه و گرنگه ب زوترین ده‌م ببه‌نه ده‌ف نوشدارێن ده‌روونی).
شێروانی گۆتژی: (نابیت گه‌له‌ك دانوستاندنێن دژوار ل گه‌ل بكه‌ن و بێژنێ هوون د نه‌خوشن و د لاوازن، به‌لكو پێدڤیه بێژنێ هوون دشێن و بهێزن، ل گه‌ل خوه ببه‌نه سه‌ره‌دان و گه‌ریانان، ئه‌و تشتێن ئه‌و پێ توره دبن پێدڤیه ژ وان دوور كه‌ن و نابیت بێژنێ هوون د خه‌له‌تن، گرنگه د بیره‌وه‌ریێن جڤاكی و خولێن فێربوونێ دا پشكدار بكه‌ن).
سه‌باره‌ت نیشانێن ڤێ نه‌خوشیێ چاره‌سه‌ركارێ ده‌روونی دیار كر كو سیسته‌مێ وان یێ خه‌وێ و خوارنێ تێك دچیت، زوو توره دبن و تووشی خه‌موكیێ و دوو دلیێ دبن، هه‌نه تووشی تێكچوونا واسواسێ دبن، هه‌ستێن وان تێك دچن، ل گه‌ل خوه د ئاخڤن، خوه مه‌زن دبینن، خوه ژ ئه‌ندامێن خێزانێ و جڤاكی دوور دكه‌ن و تێكه‌لیێ ناكه‌ن و نه‌شێن كاران ب درستاهی ئه‌نجام بده‌ن و گوهلێبوونا هنده‌ك ده‌نگان كو بتنێ وان گوهلێ دبیت و د كه‌تواری دا نینن و گۆت: (كێم د ئاخڤن و كێم به‌رسڤێ دده‌ن و دبیت هه‌ما به‌رسڤێ نه‌ده‌ن و ئاخفتنێن وان گه‌له‌ك جاران نه د رێكخستینه).
شێروان ئه‌و چه‌نده ژی دیار كر، ئه‌ڤ نیشانێن مه ئاماژه پێكرین مه‌رج نینه هه‌موو ل ده‌ف نه‌خوشه‌كێ شیزوفرینیایێ هه‌بن، ژبه‌ركو شیزوفرینیایێ جورێن خوه هه‌نه، لێ ئاستێ دژواریێ و كارتێكرنێ ژ مروڤه‌كی بو مروڤه‌كێ دی جیاوازیا خوه هه‌یه و گۆت: (كه‌سێ توشبوویی رێژا سڤكه و ناڤنجیه ئه‌ڤه دشێن ده‌ركه‌ڤن ژیانا خوه یا روژانه ببورینن، به‌لێ رێژا دژوار د میننه مالڤه و لژێر چاڤدێریا مالن).
چاره‌سه‌ركارێ ده‌روونی هنده‌ك رێیه چاره‌سه‌ری دیار كرن و ئاماژه پێ كر كو ئه‌ڤه ژی نه‌خوشیه‌كه و نه ب مروڤیه و دژوارتره ژ تێكچوونێن دی یێن ده‌روونی، هه‌موو ئێشان رێكێن خوه یێن چاره‌سه‌ریێ یێن هه‌ین ب رێژێن جیاواز راسته نه‌خوشیا شیزوفرینیایێ ب زه‌حمه‌ترین گوپیتكا تێكچوونا ده‌روونیه به‌س د هه‌مان ده‌مدا دهێته كونترول كرن و گۆت: (چاره‌سه‌ریا ده‌رمانان گرنگه لژێرچاڤدێریا نوژدار و بسپورێ ده‌روونی بیت، ده‌مێ بكار دئینن ره‌وشا وان باشتر دبیت و هزرو بیرێن وان ژی باشتر دبن، هه‌روه‌سا چاره‌سه‌ریا ب رێكا رینشتنان كو ژلایێ هزر و ره‌فتار و هه‌ستانڤه هه‌تا راده‌كی دێ شێن هاری وان كه‌ن، بو زانین هندی نه‌خوش زیتر بهێته چاره‌سه‌ریێ شانسێ باش بوونا وی ژی دێ پتر بیتن هه‌روه‌سا خێزان و جڤاك ژی دشێن هاری بكه‌ن ،هه‌كه لدووڤ رێنمایان چاره‌سه‌ریا درست وه‌رگرن وه‌كو هه‌ر نه‌خوشیه‌كا دی ناگه‌هنه رادێ دژوار).
