چاره‌سه‌ریه‌كادی بۆ مامۆستایێن وانه‌بێژ هاتیه دیتن
هه‌ولێر، قائید میرۆ
مامۆستایێن وانه‌بێژ ده‌ست ب خۆنیشاندان و بایكۆتا هۆلێن خواندنێ كریه و تاكه مه‌رجێ وان بۆ دوماهی ئینان ب خۆنیشاندانان دامه‌زراندنا وانه ژلایێ حوكمه‌تا هه‌رێما كوردستانێ سه‌رۆكێ لیژنا په‌روه‌رده و خواندنا بلندژی ئاشكراكر، ژبلی پڕۆژێ حوكمه‌تێ بۆ مه‌زاختنا پاره‌كێ هه‌یڤانه چاره‌سه‌ریه‌كادیژی مه دیاركریه بۆ دامه‌زراندنا مامۆستایێن وانه‌بێژ و قۆناغا دویێ دێ كار بۆ جێ به‌جێكرنا ئه‌ڤێ چاره‌سه‌ریێ بكه‌ین.
هنار ئه‌یاد، ئێك ژ مامۆستایێن گرێبه‌سته و بۆ رۆژناما ئه‌ڤرۆ دیاركر” چه‌ندین ساله مه زانكۆ و په‌یمانگه دوماهی ئینای هیڤیا دامه‌زراندنێ، نوكه ئه‌م بووینه مامۆستایێن وانه‌بێژ، مخابن مامۆستایێ وانه‌بێژ نه‌مرنه نه‌ژین، چونكه مه چو مافه‌ك نینه ده‌وامه‌كا زۆر و كریه‌كا كێم، له‌وڕا ئه‌م داخواز دكه‌ین حوكمه‌تا هه‌رێما كوردستانێ ره‌وشا مامۆستایێن وانه‌بێژ به‌رچاف بگریت و بڕیارا دامه‌زراندنێ ده‌ربكه‌ت، ژبلی دامه‌زراندنێ ئه‌م ب چو شێوه‌یه‌كی رازینابین هه‌ر چاره‌سه‌ریه‌كادی بهێته دیاركرن بۆ مامۆستایێن وانه‌بێژ، ئه‌ڤه چه‌ندین ساڵه هه‌ر وانه‌بێژ مامۆستا هه‌یه خودان خێزانه و هێشتا كریا سالا بۆری وه‌رنه‌گرتیه، ڤێجا كریا خواندنێ مامۆستا هه‌یه ئێك هه‌یڤ ناگه‌هیته 100 هزار دیناران، ما ئه‌ڤه ژیانه هوسا ببیه مامۆستا.
ئه‌ڤێ مامۆستایا وانه‌بێژ ئاشكراكر” مامۆستایێن وانه‌بێژ چو مافه‌ك نینه، هه‌تا رۆژانه حسه بۆ هاتینه دیاركرن و نه‌شێت چو جورێن مۆهله‌تێ وه‌ر بگرن، هه‌روه‌سا خزمه‌ت بۆ ناهێته هژمارتن و زێده‌هیا مووچه‌ی نینه، تنێ پاره‌یه‌كێ كێم هاتیه دیاركرن، ئه‌ڤه دده‌مه‌كی دایه نوكه كه‌رتێ په‌روه‌ردێ لسه‌ر ملێن وانه‌بێژانه و چه‌ندین قوتابخانه هه‌نه ئه‌گه‌ر مامۆستایێن وانه‌بێژ نه‌بن ئه‌ڤه ناهێنه رێڤه‌برن و ئاریشه‌یا كێمیا میلاكی هه‌یه، پرسیارامه ئه‌ڤه ئه‌گه‌ر حوكمه‌ت دێ هه‌ر پاره‌یه‌كی بده‌ته مامۆستایێن وانه‌بێژ بۆچی ب ئێكجاری ناهێنه دامه‌زراندن هه‌م ئه‌م وه‌كی مامۆستا دێ بینه خودان ماف و شایسته‌یێن بۆ مامۆستا هاتینه دیاركرن هه‌مژی دێ ئاریشه‌یا كێمیا میلاكی ژی بهێته چاره‌سه‌ركرن، هوسا بیت دێ پرۆسا په‌روه‌ردێ به‌ره‌ف لاوازیێن زێده بچیت مامۆستا ده‌وامێ نه‌كه‌ن و هه‌ر بایكۆت و خۆنیشاندان بهێنه‌كرن دێ زیان بۆ كه‌رتێ په‌روه‌ردێ هه‌بن.
عه‌بدولسه‌لام دۆله‌مه‌ری، سه‌رۆكێ لیژنا په‌روه‌ردێ لپه‌رله‌مانێ كوردستانێ بۆ رۆژناما ئه‌ڤرۆ گۆت” مه به‌ری نوكه چه‌ندین كۆمبوون دگه‌ل لایه‌نێ به‌رپرس كرینه لدۆر ئاریشه‌یا مامۆستایێن گرێبه‌ست و نوكه‌ژی ئه‌م به‌رهه‌ڤین پشته‌ڤانیا وانا بكه‌ین، به‌ری نوكه مه لپه‌رله‌مانێ كوردستانێ 90 په‌رله‌مانتاران داخواز ل وه‌زیرێ دارایی و حوكمه‌تێ كربو چارسه‌ریه‌كێ بۆ پرسا مامۆستایێن وانه‌بێژ ڤه‌بینن، نوكه پڕۆژه‌یه‌ك هاتیه به‌رهه‌ڤكرن و بڕیاره بچیته بیاڤێ بجه ئینانێ دا، به‌ری هه‌لبژارتنان بڕیاربو وه‌زیرێن په‌یوه‌ندیدار بهێنه په‌رله‌مانی و رۆهنكرنێ بده‌ن لدۆر چاره‌نڤیسێ مامۆستایێن وانه‌بێژ، به‌لێ دیار ژبه‌ر رێڤه‌چوونا هه‌وال هه‌لبژارتنان هاتنا وه‌زیران بۆ په‌رله‌مانی گیرۆبوویه و بڕیاره ڤێ حه‌فتیێ هه‌رسێ وه‌زیرێن دارایی و په‌روه‌رده و خواندنا بلند بهێنه په‌رله‌مانی بۆڤێ مه‌ره‌مێ، حوكمه‌تێ پڕۆژه‌یه‌ك هه‌یه و تێدا پاره‌یه‌كێ هه‌یڤانه دیاركریه بۆ مامۆستایێن وانه‌بێژ بهێته مه‌زاختن، گوره‌ی باوه‌رنامه و جهێ ئاكنجیبوونێ پاره هاتیه دیاركرن، واته مامۆستایێن باوه‌رناما به‌كالریۆس هه‌بیت پاره‌یه‌كێ هه‌یڤانه بۆ هاتیه دیاركرن و یێن باوه‌رنامه‌یێن دیژی هه‌بن پاره بۆ دیاركریه، هه‌روه‌سا بۆ مامۆستایێن وانه‌بێژ یێن هاتن وچوونا ده‌رڤه‌ی باژێڕا دكه‌ن پاره‌یه‌كێ زێده دێ بهێته مه‌زاختن، ئه‌ڤه چاره‌سه‌را حوكمه‌تێ یه‌و جارێ حوكمه‌ت دبێژیت هنده د شیانێن مه‌دایه.
عه‌بدولسه‌لام دۆله‌مه‌ری ئاماژه‌كر” لیژنا په‌روه‌ردێ دێ به‌رده‌وامبیت لسه‌ر بزاڤێن خۆ بۆ دامه‌زراندنا وانه‌بێژان و مه‌ژی چاره‌سه‌ریه‌كادی هه‌یه و دێ پڕۆژێ خۆ پێشكه‌شی حوكمه‌تا هه‌رێما كوردستانێ بكه‌ین، ئه‌وژی دامه‌زراندنا مامۆستایێن وانه‌بێژه ل جهێ وان مامۆستایێن دهێنه خانه‌نشینكرن، چونكه سالانه گوره‌ی قانوونێ هژماره‌ك مامۆستا دهێنه خانه‌نشینكرن ودوماهی ب خزمه‌تا وان دهێت ل كه‌رتێ په‌روه‌ردێ ئه‌م دخوازین هه‌ر سال چه‌ند مامۆستا دهێنه خانه‌نشینكرن هه‌مبه‌ردا وانه‌بێژ بهێنه دامه‌زراندن ئه‌ڤه‌ژی دێ چاره‌سه‌ره‌كا گونجای بیت و هه‌موو مامۆستا دێ هێنه دامه‌زراندن، ئه‌م هیڤیدارین ئه‌و پڕۆژێ مه بهێته قه‌بوولكرن ژلایێ حوكمه‌تێ و كار بۆ بجه ئینانێ بكه‌ن، هه‌تا مافێ مامۆستایێن وانه‌بێژی بهێته‌دان و بهێنه دامه‌زراندن، ئه‌م دێ به‌رده‌وام پشته‌ڤانیا مامۆستایێن وانه‌بێژ بكه‌ین هه‌روه‌كی به‌ری نوكه‌ژی مه به‌ڕه‌ڤانی بۆ مافێن واناكریه و دێ كه‌ینژی، چونكه چاڤێ وانا ل دامه‌زراندنێ یه، بلا وه‌زیرژی بهێته په‌رله‌مانی و زانیاریا بده‌ته په‌رله‌مانی وی ده‌می دێ زانین حوكمه‌تێ چو نیه‌ت هه‌یه بۆ دامه‌زراندنا وانه‌بێژان.
