چاره‌نڤیسێ نێزیكی سێ هزار ره‌ڤاندیێن ئێزدی یێ دیار نینه
دهۆك، له‌زگین جوقی:
به‌رپرسێ نڤیسینگه‌ها رزگاركرنا ره‌ڤاندیێن ئێزدی دیار كر، رزگاربوویێن ئێزدی ژ ئه‌گه‌رێ زڤڕینا هژماره‌كا وان عه‌ره‌بێن ده‌ست د جینۆسایدا شنگالێ دا هه‌ین ڤه‌ناگه‌ڕنه شنگالێ.
حسێن قائیدی، به‌رپرسێ نڤیسینگه‌ها رزگاركرنا ره‌ڤاندیێن ئێزدی بۆ رۆژناما ئه‌ڤرۆ گۆت: “هه‌ژماره‌ك ژ رزگاربوویێن ئێزدی یێن چووینه ده‌رڤه‌ی وه‌لاتی و گه‌له‌ك ژی ماینه د ناڤ كه‌مپان دا و نوكه ل سنوورێ پارێزگه‌ها دهۆكێ دژین و ناخوازن ڤه‌گه‌ڕنه شنگالێ و وان دڤێت ل كوردستانێ بژین”.
ئاشكرا ژی كر، هه‌بوونا گرۆپێن چه‌كدار و نه‌بوونا ته‌ناهی و خزمه‌تگوزاریان، دیسا زڤڕینا هه‌ژماره‌كا وان عه‌ره‌بان یێن سالا 2014ێ ده‌ست د جینۆسایدا شنگالێ دا هه‌ین، نوكه بووینه مه‌ترسی ل سه‌ر ژیانا رزگاربوویێن ئێزدی، له‌و خه‌لكێ شنگالێ نه‌وێرن ڤه‌گه‌ڕن و گۆت: “د جینۆسایدا شنگالێ دا پتر ژ شه‌ش هزار و 417 كه‌س ژ لایێ تیرۆرستێن داعش ڤه هاتنه ره‌ڤاندن و بێ سه‌روشوونكرن، هه‌تا نوكه سێ هزار و 550 ره‌ڤاندیێن ئێزدی یێن هاتینه رزگاركرن و هیشتا چاره‌نڤیسێ پتر ژ دو هزار و 700 ره‌ڤاندییان یێ دیار نینه، لێ كار ل سه‌ر رزگاركرنا ره‌ڤاندییان یێ به‌رده‌وامه”.
