چاره‌نڤیسێ كوردان ب زمانه‌كێ بیانی نائێ په‌ژراندن
هه‌رده‌مێ ته پێ یێ خوه كره د پێلاڤا كه‌سه‌ك دن دا و ته هه‌ست پێ نه‌كر، هینگێ پێداچوونه‌كێ دخوه دا بكه، گه‌ر كێماسێن خوه دخوه‌دیكێرا نه‌بینی نه‌چه به‌ر، دیسا گه‌ر بزانی گوتنا ته ئاریشه‌یێ چاره‌ناكه نه‌گۆتن باشتره. یا خوه‌یایه كو كێشه‌یا مووسل ڤه‌دگه‌ره بۆ پشتی ژناڤچوونا ده‌وله‌تا عوسمانی د شه‌رێ ئێكێ یێ جیهانی ده و په‌یدابوونا ده‌وله‌تا عێراقی ل بن چاڤدێریا به‌ریتانیا و ژبه‌ر گرنگی و ده‌وله‌مه‌ندیا جه و ئاخا ویلایه‌تا مووسل ئه‌ڤ كێشه به‌ره به‌ره مه‌زنتر دبوو و هه‌ر كه‌س و لایه‌نه‌كێ كورسیێ ده‌سه‌لاتێ ل عیراقێ گرتیه‌به‌ر ل دووڤ به‌رژه‌وه‌ندیێن خوه یێن به‌رته‌نگ و هزرێن خوه یێن شۆڤێنی كێشه‌یا مووسل ب هه‌لاویستی هێلایه، نه‌مازه پشتی ژناڤچوونا رژێما به‌عسا سه‌دامێ گور ب گور و هاتنا ده‌نگ و ره‌نگه‌كێ نوو ژبۆ گرتنا كورسیێ ده‌سه‌لاتێ و نه‌شیاین ب رێكه‌كا یاسایی و ده‌ستووری ڤێ كێشه‌یێ چاره‌بكن و خه‌لكێ ڤێ ده‌ڤه‌رێ ب مه‌ره‌مێن تایفه‌گه‌ری پاشگوه ئاڤێتی، بوویه ئه‌گه‌ر كو ره‌نگه‌كی ره‌شێ ته‌روری ب ئاهه‌نگ و ده‌ستقوتانێن خه‌لكێ باژارێ مووسلێ بسه‌ردا بێن، هه‌رچه‌نده قه‌زایا شنگالێ ئه‌وا سه‌ر ب پارێزگه‌ها مووسلێ ڤه ماوه‌یه‌كی ژلایێ پێشمه‌رگه‌یێن قه‌هره‌مان ڤه هاتبوو پاراستن لێ ژئه‌گه‌رێ جوگرافیه‌كا نه‌هاریكار و نه‌بوونا چه‌كه‌كێ پێدڤی نه‌شیاین به‌رده‌وامیێ ب پاراستنا وێ بدن، ئه‌وبوو ل 3/8/2014 و پشتی شه‌ره‌كێ گران ئه‌ڤ قه‌زایه ب هه‌می ناوچه و گوندێن خوه‌ڤه سه‌رباری تالانكرن و بنپێكرنا نامووس و كه‌رامه‌تا خه‌لكێ ڤێ ده‌ڤه‌رێ كه‌فته د ده‌ستێ ڤان تیرۆرستێن رووره‌شێن بناڤ(داعش). لێ حه‌مد و سه‌نا بۆ وی خودایی یێ كو سه‌روك مه‌سعود بارزانی مینا هنارتیه‌كی بۆ مه هنارتی شیا ب ده‌سه‌لاتا خوه یا حه‌كیمانه و ب سه‌رپه‌رشتیه‌كا مه‌یدانی ل 17/12/2014 بریارا ئۆپه‌راسیونه‌كا هه‌ری ب هێز و باندۆر بده‌ت و شیان د ده‌میێ 48 ده‌مژمێران دا نێزیكی (3000 كم2) هه‌ر ژ ده‌ردۆرا زومار تاكو تاخێ به‌ربه‌روژێ ناڤا شنگالێ ژ تیرۆرستان پاقژبكه و زارۆێن ئاواره ل چیایێ شنگالێ ب دێمه‌كی پری گرنژین و ب چاڤه‌كی تژی ئۆمێد و ب گۆتنا بژی پێشمه‌رگه ل 21/12/2014 ل خوه پێشوازی بكه، ژنووڤه هنه‌ك كه‌سێن خوه‌دی هزرێن شۆڤین مینا هه‌ڤسه‌رۆكێ په‌كه‌كێ جه‌میل بایك و هه‌ڤسه‌رۆكێ به‌ده‌پێ سه‌لاحه‌ددین ده‌میرتاش ل شوونا لاڤایێن فره‌هكرنا سنۆرێ هه‌رێما كوردستانا باشوور بكن داخوازا ئێك پارچه‌یا عێراقێ دكن یانژی شنگالێ ب هه‌رێمه‌كا جودا ژ هه‌رێما كوردستانێ دبینن و ئه‌و خه‌ونا باڤ و كالێن مه گیانێ خوه بۆ شرۆڤه‌كرنا وێ كری قوربان بن پێ بكه، نوزانم هزرناكن كو ئه‌ڤ هه‌می جانگوریكرنا پێشمه‌رگه‌یێن قه‌هره‌مان ژبۆنا چیه؟ یان ژی ته‌نێ دڤێت ئێكرێزیا كوردان تێك بدن و كوردان په‌رت و به‌لاڤه بكن ئه‌گینا نوزانن مه چاڤێن ره‌ش بۆ كه‌سێ نه‌كلدانه. هه‌ر چه‌نده ل خوه ب گومان نینم لێ خوه‌زی د هزرا خوه‌دا یێ شاش بم ژبه‌ركۆ هزردكم هنه‌ك ده‌ستێن ناڤخوه‌یا هه‌رێمێ ئه‌وێن هه‌رتم هه‌ڤپشك بۆ سه‌ركه‌فتنێن پێشمه‌رگه‌ی دبه‌ره‌یێن شه‌رده ددیتن هه‌بن، ئه‌ڤه‌ژی ڤه‌دگه‌ره بۆچاڤ پێنه‌رابوونا سه‌ركه‌فتن و گه‌هشتنا گوپیتكێ ب سه‌روه‌ری و سه‌ركێشیا سه‌روك بارزانی ئه‌وێ شه‌ڤ و رۆژان بۆ ڤێ مه‌ره‌مێ دكت ئێك، لێ نابێژین هه‌رن خوه ژ لیستا تیرۆرێ ده‌ربینن یان ژی گونده‌كی ژ ئاخا نها هوون ب سه‌رڤه شوره‌شێ بۆ دكن و دبنڤه به‌رژه‌وه‌ندیێن دوژمنان دپارێزن ته‌نێ دێ بێژین هه‌رن خوه فێری زمانێ شرینێ كوردی بكن و پاشی ل چاره‌كرنا كێشه‌یێن كوردان خوه‌دی ده‌ركه‌ڤن ژبه‌ركو چاره‌نڤیسێ كوردان ب زمانه‌كێ بیانی نائێ په‌ژراندن و د ڤێ هه‌موو ئالی باش بزانن ته‌نێ گۆتنا سه‌روكێ هه‌رێمێ دێ یا ره‌وا بت ده‌ما ب چه‌پله‌قوتانا كوردێن ئێزدی ل سه‌رێ چیایێ شنگالێ د رۆژا راكرنا گه‌مارۆیا ل سه‌ر ئاواره‌یێن ل سه‌رێ چیای كه‌ره‌مكری و گۆتی: ته‌نێ خه‌لكێ شنگالێ دێ بریارێ ل سه‌ر چاره‌نڤیسێ خوه دت.
