چارچۆڤێ هه‌ماهه‌نگیێ دانوستاندنان ل گه‌ل كوردان دئێخیته پێش ئالیێن دی
ئه‌ڤرۆ:
ئه‌ندامه‌كا جڤاتا نوونه‌رێن ئیراقێ ژ هه‌ڤپه‌یمانیا چارچۆڤێ هه‌ماهه‌نگیێ راگه‌هاند، دانوستاندن و سه‌ره‌دانێن وێ هه‌ڤپه‌یمانیێ دێ ژ ئالیێن كوردی ده‌ستپێكه‌ت بۆ چارسه‌ره‌یا پرسا هه‌لبژارتنا سه‌رۆك كۆماری و پاشی بۆ پرسێن دی ل گه‌ل ره‌وتێ سه‌دری و سوننه‌یان دێ گۆمبن.
ئینتیسار جه‌زائری، ئه‌نداما جڤاتا نوونه‌رێن ئیراقێ ژ هه‌ڤپه‌یمانیا چارچۆڤێ هه‌ماهه‌نگیێ گۆت” شاندێ دانوستاندكارێ چارچۆڤێ هه‌ماهه‌نگیێ سه‌ره‌دانا ئالیێن كوردی كریه كارێ خوه یێ به‌راهیێ و ب كۆمبوونێ ل گه‌ل ئێكه‌تی نیشتمانی كوردستان ده‌ستپێكر كو ل رۆژا چارشه‌مبی 6 نیسانێ ل به‌غدا هاته ئه‌نجامدان”.
ئینتیساری گۆت ژی” پلانا چارچۆڤێ هه‌ماهه‌نگیێ ب وی جۆری یه كو ل ده‌ستپێكێ كێشا پۆستێ سه‌رۆك كۆماری بهێته چاره‌سه‌ركرن، ئه‌وژی ب رێیا نێزیككرنا ئالیێن كوردستانی یه كو پۆستێ سه‌رۆك كۆماری گرێیا سه‌ره‌كیه ل به‌رده‌م رێككه‌فتنا ئالیان و پێكئینانا حوكمه‌تا ئیراقی یا نوو”.
رێبه‌ر ئه‌حمه‌د، به‌ربژارێ پارتی دیموكراتی كوردستانه بۆ پۆستێ سه‌رۆك كۆماری و به‌رهه‌م سالح به‌ربژارێ ئێكه‌تی نیشتمانی كوردستانه بۆ وی پۆستی، هه‌ڤپه‌یمانیا رزگاركرنا نیشتمانی كو ژ ره‌وتێ سه‌دری و هه‌ڤپیه‌مانیا سیاده و پارتی پێكدهێت، پشته‌ڤانیا به‌ربژارێ پارتی دكه‌ن، ل ئێكێ نیسانا 2022 چارچۆڤێ هه‌ماهه‌نگیێ كوپ تریا ئالیێن شیعی پێكدئینن ده‌ستپێشخه‌ریه‌ك راگه‌هاند بۆ چارسه‌ریا قه‌یرانا سیاسی ل ئیراقێ كو دیارترین خالێن وێ ده‌ستپێشخه‌ریێ پێكئینانا مه‌زنترین فراكسیۆن بوو ل گه‌ل فراكسیۆنا سه‌دری ل جڤاتا نوونه‌رێن ئیراقێ.
ئه‌و ده‌ستپێشخه‌ریه رۆژه‌كێ پشتی تویته‌كا موقته‌دا سه‌در، رێبه‌رێ ره‌وتێ سه‌دری بوو كو ده‌مێ 40 رۆژان ده‌لیڤه دایه هه‌ڤپه‌یمانیا چارچۆڤێ هه‌ماهه‌نگیێ بۆ پێكئینانا حوكمه‌تا ئیراقی یا نوو بێی پشكداریا ره‌وتێ سه‌دری.
محه‌مه‌د قه‌دری، ئه‌ندامێ جڤاتا نوونه‌رێن ئیراقێ ژ فراكسیۆنا ده‌وله‌تا قانوونی دبێژیت” مه هیچ ئالیه‌ك ژ دانوستاندنان دگه‌ل دا پشت گوه نه‌هاڤێتیه و بێ ره‌وتێ سه‌دری ژی ئه‌م ناچینه دناڤ حوكمه‌تا نوو دا”.
ناڤبری پێشبینی كر ب شێوه‌یه‌كێ ب ساناهی بشێن ل گه‌ل فراكسیۆنا سه‌دری رێكبكه‌ڤن وگۆت” ل چه‌ند رۆژێن داهاتی دا دێ ب تمامی شێوازێن دانوستاندنان رۆهن بن و هه‌كه موقته‌دا سه‌در نه‌ڤیا پێشوازیێ ل شاندێ هه‌ڤپه‌یمانیا چارچۆڤێ هه‌ماهه‌نگیێ بكه‌ت، وی ده‌می دێ مه ئاخڤتنا خوه هه‌بیت و كۆمبوونان ل گه‌ل ئالیێن دی نا راوه‌ستینین”.
پێشتر جڤاتا نوونه‌رێن ئیراقێ ل 26 و 30 ئادارا 2022 نه‌شیابوو هه‌ژمارا قانوونی یا به‌رهه‌ڤبوونا په‌رله‌مانتارن بۆ هه‌لبژارتنا سه‌رۆك كۆمارێ نوو كۆم بكه‌ت كو پێدڤی ب 220 په‌رله‌مانتاران هه‌یه ژ ئه‌گه‌رێ بایكۆتكرنا هه‌ڤپه‌یمانیا چارچۆڤێ هه‌ماهه‌نگیێ و هه‌ژماره‌كا دی یا ئالیێن سیاسی.
