چارەسەرکرنا پرسا کوردی دێ بیتە ئەگەرێ بهێزبوونا تورکیا
نڤیسەر و ڤەکۆلەرەکێ تورک دیار دکەت هەلوەستێ وەزیرێ دەرڤە یێ ئسرائیلێ ل دۆر کوردان بوویە ئەگەرێ دلگرانیا تورکیا، لێ دڤێت بەرپرسێن تورکیا ژی باش بزانن هەتا پرسا کوردی ل تورکیا نەهێتە چارەسەرکرن دێ هەردەم مەترسی ل سەر تورکیا هەبن.
محەمەد یلماز ڤەکۆلەر و نڤیسەرێ ناڤدار یێ تورکیا دیار کر، پشتی وەزیرێ دەرڤە یێ ئسرائیلێ دیار کری کورد هەڤپەیمانێ ئسرائیلێ نە و دڤێت پتر ژ جاران ئەو گرنگیێ بدەنە کوردان، ئەڤ هەلوەستە بوویە جهێ دلگرانیا بەرپرسێن تورکیا، نها ل تورکیا گەلەک بەحسێ ڤێ یەکێ دهێتە کرن کو ئسرائیل دێ بیتە مەترسیەکا مەزن ل سەر تورکیا و گۆت: (بێگومان دڤێت ئەم ڤێ راستیێ قەبوول بکەین هەتا پرسا کوردی ل تورکیا نەهێتە چارەسەرکرن و کورد نەگەهنە مافێن خوە، دێ هەردەم مەترسی ل سەر تورکیا هەبیت، یێن نها تورکیا برێڤە دبەن ژی ڤێ راستیێ باش دزانن، هەرچەندە د ڤان رۆژێن بۆری دا هەلوەستە دەولەت باخچەلی بوویە جهێ گەنگەشێ و گەلەک کەس ب گرنگ ل قەلەم ددەن، لێ هەتا نها ب کریاری چو نەهاتیە کرن و سیاسەتا قەیوومان ژی وەسا کریە باوەریا کوردان ب سۆزێن دەستهەلاتێ ناهێت).
ناڤهاتی ئەو یەک ژی دیار کریە، دڤێت تورکیا پرسا کوردی چارەسەر بکەت، چونکی هەتا پرسا کوردی نەهێتە چارەسەرکرن دێ هەردەم پرسا کوردی وەکو کارتەکێ ل دژی تورکیا هێتە بکارئینان، دڤێت بەرپرسێن تورکیا ب رەنگەکێ جددی کار بۆ چارەسەرکرنا پرسا کوردی بکەن، دڤێت دەستهەلاتا نها یا تورکیا ڤێ راستیێ قەبوول بکەت هەکە پرسا کوردی ل تورکیا بهێتە چارەسەرکرن و کورد بگەهنە مافێن خوە دێ تورکیا بهێز کەڤیت و گۆت: (دڤێت ئێدی ب رەنگەکێ ئاشکرا ئەم بێژین کو ب سالانە زۆرداری ل کوردان هاتیە کرن، دڤێت ئەم قەبوول بکەین مافێ کوردان ل تورکیا هاتیە خوارن و ل هەمبەر ڤێ یەکێ ژی کورد بەرخوەدانێ دکەن و داخوازا مافێن خوە یێ رەوا دکەن).
محەمەد یلماز ئەو یەک ژی دیار کر، ب هاتنا ترامپی دێ ئەمریکا پتر گرنگیێ ددەتە ئسرائیلێ، ئەمریکا دێ ب هەموو شیانێن خوە کار بۆ پاراستنا ئسرائیلێ کەت، ڤێجا گرنگە تورکیا ژی پێداچوونێ د سیاسەتا خوە دا بکەت، دڤێت تورکیا ل گۆر راستیێن هەی سیاسەتێ بکەت، ژ بۆ ڤێ یەکێ ژی گرنگە تورکیا پەیوەندیێن خوە ل گەل ئەمریکا و وەلاتێن رۆژئاڤایی باش بکەت، ژ بۆ ڤێ یەکێ ژی دڤێت ژ بۆ چارەسەرکرنا پرسا کوردی ل تورکیا ژی دەست ب قۆناغەکا نوو یا ئاشتیێ بهێتە کرن و گۆت: (مخابن جارەکا دی دەست ب سیاسەتا قەیوومان هاتیە کرن، ئەو یەک شاشیەک گەلەک مەزنە، د دەمەکێ دا کو بەحسێ چارەسەرکرنا پرسا کوردی دهێتە کرن هوون قەیوومان دانێن وی دەمی باوەریا کوردان ب هەوە ناهێت، یا نها ئاکپارتی دکەت شاشیەک گەلەک مەزنە و دێ زیانێن خوە یێن گەلەک مەزن ژی بۆ ئاکپارتیێ هەبیت، دڤێت بەرپرسێن ئاکپارتیێ هزرا ڤێ یەکێ بکەن هەکە نها هەلبژارتن بهێنە کرن کورد وەکو بەرێ دەنگێ خوە نادەنە ئاکپارتیێ، بێگومان ئەو یەک دێ بیتە ئەگەرێ کێمبوونا دەنگێن ئاکپارتیێ و وی دەمی دێ پارتا کۆماریا گەل هێتە پێش، ژ بەر ڤێ یەکێ ژی گرنگە ئاکپارتی دەست ژ سیاسەتا قەیوومان بەردەت و رێزێ ل دەنگێ کوردان و ئیرادا وان بگریت).
رۆژنامەڤان و ڤەکۆلەرێ ناڤدار یێ تورکیا ئەو یەک ژی دیار کر، نها ئسرائیل یێ بزاڤان دکەت پەیوەندیێن خوە ل گەل عەرەبستانا سعوودیێ و وەلاتێن دی یێن عەرەبی باش بکەت، گەلەک ژ وەلاتیێن عەرەبی ژی ژ بۆ بەرژەوەندیێن خوە دخوازن خوە نێزیکی ئسرائیلێ بکەن، ئانکۆ دێ هەڤسەنگیێن نها ل دەڤەرێ ب تەمامی هێنە گوهۆڕین و دێ رەوشەکا نوو هێتە پێش و گۆت: (ب هاتنا ترامپی دێ پێگەهێ ئسرائیلێ گەلەک بهێزتر لێ هێت، ئسرائیل دێ ب هەموو هێزا خوە ل نەیارێن خوە دەت، ئسرائیل دێ گەلەک رێککەفتنان ژی ل گەل وەلاتێن عەرەبی ئیمزا کەت، وی دەمی دێ پێگەهێ تورکیا گەلەک لاواز بیت، ڤێجا پرسا کوردی ژی بهێتە سەر دێ مەیدان بۆ تورکیا گەلەک تەنگ بیت، ژ بەر ڤێ یەکێ ژی دڤێت تورکیا ب جهێ ئۆپەراسیۆنێن سەربازی و دانانا قەیوومان ب رەنگەکێ جددی کار بۆ چارەسەرکرنا پرسا کوردی بکەت، مخابن هەتا نها ئەو یەک نەهاتیە کرن).
ناڤهاتی د دووماهیا ئاخڤتنا خوە دا ئەو یەک ژی دیار کر، رۆژهەلاتا ناڤین بەر ب گوهۆڕینێن مەزن ڤە دچیت، ل ڤێ دووماهیێ دەولەت باخچەلی ژی گەلەک جاران بەحسێ ڤێ یەکێ کر، لێ مخابن هەتا نها دەستهەلاتێ نەشیایە ب کریاری خوە بۆ هەر گوهۆڕینەکێ بەرهەڤ بکەت، دڤێت ل تورکیا ب تایبەتی ژی ل پەرلەمانێ تورکیا بەحسێ چارەسەرکرنا پرسا کوردی بهێتە کرن، دڤێت کار بۆ دستوورەکێ نوو بهێتە کرن، ئانکۆ هندەک تشتێن گەلەک گرنگ هەنە دڤێت نها ب کریاری کار بۆ وان بهێتە کرن، هەکە نها تورکیا کار بۆ چارەسەرکرنا پرسا کوردی نەکەت دێ پاشی زیانێن گەلەک مەزن گەهنە تورکیا، لێ دیسان دێ بێژین هەکە پرسا کوردی ل تورکیا هاتە چارەسەرکرن دێ تورکیا گەلەک بهێز کەڤیت.
