چارەنڤیسێ سووریێ د دەستێ رۆسیا دایە و دڤێت کورد د هشیار بن
ئەڤرۆ
چاڤدێرێن سیاسی دیار دکەن، چو مەترسی ل سەر رژێما بەشاری نەماینە و نها بەشار ئەسەد پەیوەندیێن خوە ل گەل وەلاتێن عەرەبی ژی ئاسایی دکەت، ژ بەر پشتەڤانیا رۆسیا بەشاری شیا خوە بپارێزیت و نها ژی چارەنڤیسێ سووریێ د دەستێ رۆسیا دایە و دڤێت کوردێن رۆژئاڤا ژی ل گۆر ڤێ راستیێ سیاسەتێ بکەن.
عەلی عەفرینی چاڤدێرێ سیاسی یێ رۆژئاڤایێ کوردستانێ، کو نها ل ئەلمانیا دژیت دیار کر، ئێدی چو مەترسی ل سەر شامێ نەماینە، رژێما بەشاری شیا ب پشتەڤانیا رۆسیا و ئیرانێ خوە بپارێزیت و نها ژی بەشار ئەسەدی دەست ب بزاڤەکا نوو کریە، سووریێ پەیوەندیێن خوە ل گەل وەلاتێن عەرەبی ئاسایی دکەت، ئەو یەک ژی نیشا ددەت ئێدی چو حسابێن نوو ل سەر کەفتنا شامێ نینن و هەموو وەلاتێن جیهانێ نها بەحسێ چارەسەرکرنا ئالۆزیێن ل سووریێ دکەن، وەلاتەک وەکو تورکیا کو گەلەک بزاڤ کرن رژێما بەشاری ژناڤ بچیت نها ئەو یێ بزاڤان دکەت ل گەل بەشاری پەیوەندیێن خوە ئاسایی بکەت.
ناڤهاتی ئەو یەک ژی دیار کر، ئێدی راستیەک هەیە و دڤێت ئەم قەبوول بکەین، رژێما بەشاری ژناڤ نەچوو و نها هەموو وەلاتێن جیهانێ بەحسێ چارەسەریا ئالۆزیێن ل سووریێ دکەن، بێگومان رۆسیا و ئیرانێ نەهێلان رژێما بەشاری ژناڤ بچیت و نها ژی بەشار ئەسەدی دەست ب بزاڤەکا نوو یا دبلۆماسیێ کریە، سووریێ پەیوەندیێن خوە ل گەل سعوودیێ و گەلەک وەلاتێن دی یێ عەرەبی ئاسایی کرینە و سووریێ دێ پشکداریێ د کۆمبوونێن کۆمکارا عەرەبی دا ژی کەت، ئەو یەک ژی بێگومان بۆ بەشار ئەسەدی سەرکەفتنەکا مەزنە.
نەشەت محەمەد چاڤدێرێ سیاسی یێ خەلکێ رۆژئاڤایێ کوردستانێ ژی دیار دکەت، نها چارەنڤیسێ سووریێ ب تەمامی د دەستێ رۆسیا دایە، بەشار ئەسەد ژی نەچارە گۆهداریا رۆسیا بکەت، چونکی بەشار باشتر ژ هەر کەسەکێ دزانیت هەکە پشتەڤانیا رۆسیا نەبا وی نەدشیا رژێما خوە بپارێزیت، دا ژناڤ چیت. ژ بەر هندێ ژی هەر بریارەک ل دۆر پاشەرۆژا سووریێ ژ ئالیێ رۆسیا ڤە بهێتە دان دێ هێتە بجهئینان، ژ بەر هندێ ژی گرنگە کوردێن رۆژئاڤایێ کوردستانێ ل گۆر راستیا هەی سیاسەتێ بکەن، دڤێت کورد بەرێ خوە بدەنە رۆسیا، بلا کوردان پەیوەندی ل گەل ئەمریکا هەبن، لێ دڤێت رێڤەبەریا خوەسەر و هێزێن سووریا دیموکرات ژی باش بزانن، چارەنڤیسێ سووریێ د دەستێ رۆسیا دایە و دڤێت کورد ب رێیا مۆسکۆ بزاڤا هندێ بکەن دا شام داخوازیێن وان قەبوول بکەت.
چاڤدێرێ سیاسی یێ رۆژئاڤایێ کوردستانێ ئەو یەک ژی دیار کر، دڤێت کوردێن رۆژئاڤایێ کوردستانێ د هشیار بن، چونکی بەرپرسێن ئەمریکی ژی گەلەک جاران دیار کرینە، ئەو بۆ دەمەکێ درێژ ل سووریێ نامینن، ئەو ژ بەر شەرێ ل دژی داعشێ ل سووریێ نە، ئانکۆ دەمێ شەرێ ل دژی داعشێ ب دووماهی بهێت و رەوشا سووریێ ژی یا ئارام بیت دێ ئەمریکا ژ سووریێ دەرکەڤیت، وی دەمی دێ کورد چ کەن؟ ژ بەر هندێ گرنگە هەر ژ نها ڤە کورد پەیوەندیێن خوە ل گەل رۆسیا باشتر بکەن و بزاڤا هندێ ژی بکەن ب رێیا رۆسیا وەسا بکەن دا شام یا نەچار بیت هندەک ژ داخوازیێن کوردان قەبوول بکەت.
ئەو یەک د دەمەکێ دایە کو بەری نها د. ئەکرەم ئۆنەن بسپۆرێ پەیوەندیێن نێڤدەولەتی ژی بۆ ئەڤرۆ دیار کربوو، رۆسیا پشتەڤانیێ ل مافێن کوردان ل سووریێ دکەت، رۆسیا دڤێت سیستەمێ سووریێ فیدرالی بیت و کوردان ژی هەرێمەکا خوە هەبیت، لێ بەرپرسێن رۆسیا دبێژن هەتا نها ژی داخوازیێن کوردان ل سووریێ دیار نینن، کورد نزانن کا وان چ دڤێت، ژ بەر هندێ ژی گرنگە هێزێن کوردی یێن رۆژئاڤایێ کوردستانێ بریارەکا دروست بدەن، دڤێت هێزێن کوردی خوە ئێکلا بکەن و بریارا خوە بدەن، چونکی هەر کەس دزانیت پرسا کوردی ل سووریێ دڤێت ل شامێ بهێتە چارەسەرکرن، وی دەمی ژ بلی شامێ کوردان چو ناڤونیشانێن دی بۆ چارەسەریێ نینن، ژ بۆ هندێ ژی دڤێت کورد پشتەڤانیا رۆسیا ژ دەست نەدەن، چونکی ئاشکرایە مۆسکۆ دێ پاشەرۆژا سووریێ ئێکلا کەت نە ئەمریکا
