چارەنڤیسێ هزاران کەسان ل غەزە دیار نینە
رێکخستنا مافێن مرۆڤی یا سەر ب نەتەوەیێن ئێکگرتی دوهی د راپۆرتەکێ دا دیار کر، ژ رۆژا دەستپێکرنا شەرێ د ناڤبەرا ئسرائیلێ و حەماسێ دا هەتا نها چارەنڤیسێ پتر ژ ١٠ هزار کەسان دیار نینە، ژ بەر بۆردومانێن دژوار یێن ئسرائیلێ ب هزاران ئاڤاهی خراب بووینە، دبیت ب سەدان تەرم ل ژێر ئاڤاهیان دا مابن، ژ بەر ڤێ یەکێ ژی دڤێت د زووترین دەم دا شەڕێ هەی ب دووماهی بهێت، چونکی خەلکێ سڤیل ل غەزە تووشی کارەساتەکا گەلەک مەزن بووینە و رۆژانە ژن، زارۆ و کەسێن دانعەمر دبنە قوربانی.
هەمان رێکخستنێ ئەو یەک ژی دیار کریە، سەرەرای کو هەتا نها گەلەک هاریکاریێن مرۆڤی گەهشتنە دەستێ خەلکێ سڤیل ل غەزە، لێ دیسان ژی کارەساتێن مەزن ل غەزە روو داینە و دڤێت شەڕێ نها ل غەزە بهێتە راگرتن، چونکی بەردەوامیا شەڕی دبیتە ئەگەرێ روودانا کارەساتێن مەزن و غەزە ب تەمامی وێران بوویە.
