چار برایێن پەرلەمانتارەکی چەکدارێن داعشێ نە
ئەڤرۆ نيوز:
ئاژانسەکا دەنگوباسان یا عیراقی ل دووڤ ھندەک ژێدەران بەلاڤکریە کو چار برایێن ئەندامەکێ جڤاتا نوونەرێن عیراقێ چەکدارێن رێکخستیا داعش یا تیرۆرستی نە و دو ژ برایێن وی یێن ھاتینە کوشتن و ھەر دو برایێن وی یێن دی ژی ھەتانوکە یێن دناڤ رێزێن تیرۆرستێن داعشێ دا ماین.
ل دووڤ ئاژانسا (خەبەر) یا دەنگوباسان یا عیراقی، چار برایێن ئەندامێ جڤاتا نوونەرێن عیراقێ ژ فراکسیۆنا ئێکەتیا ھێزێن دیموکراتی یا سونی (زاھد محەمەد سولتان ئەلخاتونی) گەھشتبوونە رێزێن چەکدارێن تیرۆرستێن داعشێ کو ئێک ژ وان ب ناڤێ (عەدای محەمەد سولتان ئەلخاتونی) کو سەرکردەکێ داعشێ بوو، ل ڤێ دووماھیێ د شەڕەکی دا ل گەل ھێزێن (سووریا دیموکراتی) ل ناحیا (ئەلھول) ل پارێزگەھا حەسەکە یا سووری یێ ھاتیە کوشتن و تیرۆرستێن داعشێ تەرمی وی ل قەزا بەعاج یا ب سەر پارێزگەھا نەینەوا ڤە یێ ڤەشارتی.
دیسا خویاکریە ژی کو برایەکێ دی یێ وی پەرلەمانتاری ل دەمێ دروستکرنا بۆمبان ھاتبوو کوشتن ل سالا ٢٠١٢ ێ پشتی بۆمبەک پێڤە پەقی، بەلێ ھەتا نوکە ھەردو برایێن وی یێن دی ب ناڤێن (سەفوک و کامل) یێن دناڤ رێزێن چەکدارێن تیرۆرستێن داعشێ دا.
