چار راهێنه‌رێن دهۆكێ پشكداریێ د خولا ئاسیا دا دكه‌ن
ئه‌ڤرۆ، قه‌یس وه‌یس
ب پشكداریا 28 كه‌سان سه‌ر ئاستێ كوردستانێ و ئیراقێ و بۆ جارا ئێكێ یه خوله‌كا راهێنانێ سه‌ر ئاستێ ئاسیا یا یاریا بادمینتونێ ل هه‌ولێرا پایته‌خت بۆ دو شێوازێن جودا ئه‌وژی Shuttle Time و Level1 هه‌تا ده‌ستپێكا حه‌فتیا بهێت به‌رده‌وام بیت.
لدور ڤێ یه‌كێ هه‌ڤال عه‌بدولعه‌زیز ئێك ژ سه‌رپه‌رشتێن خولێ و ئه‌ندامێ ئێكه‌تیا عه‌ره‌بی بۆ رۆژناما ئه‌ڤرۆ گۆت: بۆ جارا ئێكێ یه ئه‌ڤ خوله ل سه‌ر ئاستێ ئیراقێ دهێته رێكخستن كو ب چاڤدێریا ئیكه‌تیا ئاسیا و ژلایێ وانه‌بێژێ نێڤده‌وله‌تی سام بینسان هه‌تا سێیێ هه‌یڤا بهێت به‌رده‌وام بیت، خول هاتیه به‌لاڤكرن ل سه‌ر دو شێوازا یا ئێكێShuttle Time كو هه‌ر كه‌سه‌ك دشیا پشكداربیت و ب خولا پشكداریكرنێ باوه‌رنامه وه‌دگریت و دبیته ده‌ستپێك بۆ پشكداریێ د خولا Level1 كو ئه‌و دڤێت هنده‌ك مه‌رج هه‌بن و لدووماهیێ تاقیكرنێن تیۆری و پراكتیكی هه‌بن هه‌تا پشكدار بشێت باوه‌رناما راهێنانێ یا لێڤێل وه‌ن وه‌ربگریت، هه‌روه‌سا ناڤهاتی لدور هژمارا پشكدارن گۆت: سه‌رجه‌مێ وان 28 پشكدارێن كوڕ و كچن ئه‌وژی چار ژ پارێزگه‌ها دهۆكێ، دو ژ هه‌ولێر و سێ ژ كه‌ركووكێ نه و یێن مایی ژ هه‌موو پارێزگه‌هێن دی یێن ئیراقێ نه.
ژلایێ خوه‌ڤه كاژین فه‌رزنده پشكدارا خولێ گۆت: ئه‌ڤه پێگاڤه‌كا گه‌له‌ك باش بوو ژلایێ به‌رپرسێن ڤێ یاریێ ل كوردستانێ و ئیراقێ هاتیه هاڤێتن، هه‌تا نوكه مفایه‌كێ ئه‌كادیمی و زانستی ژ ڤێ خولێ وه‌ردگرین، بهڤییا وێ یه‌كێ بۆ ماوه‌یێ بهێت بشێن خزمه‌تا وه‌رزشڤانێن یاریا بادیمنتۆنێ بكه‌ین.
