چار روودانێن خوه كوشتنێ د رۆژه‌كێ دا ل دهۆكێ روودان
ئه‌ڤرۆ:
د چار روودانێن جودا یێن خوه كوشتنێ دا ل پارێزگه‌ها دهۆكێ سێ كه‌سان دووماهی ب ژیانا خوه ئینا، كو د ژ وان ژنن و كه‌سه‌كی ژی دو گۆله ل خوه دان لێ نه‌مریه.
دوهی 20/2/2022 گه‌نجه‌كێ 21 سالی، كو خه‌لكێ ناحیا كه‌له‌كچی یا سه‌ر ب قه‌زا شێخان ڤه‌یه خوه خه‌ندقاند.
ئه‌و گه‌نجێ ل ناوچه‌داریا كه‌له‌كچی دووماهی ب ژیانا خوه ئینای ناڤێ وی (عومه‌ر عه‌بدولعه‌زیز ئه‌حمه‌د)ه و ده‌رچوویێ پشكا په‌رستاری بوویه ل زانكۆیا پۆلیته‌كنیكی یا دهۆكێ.
دیسا هه‌ر دوهی 20/2/2022 ژنه‌كێ ل تاخێ قاپه‌كی ل ده‌ڤه‌رداریا ئاكرێ ب گۆله‌یه‌كێ دووماهی ب ژیانا خوه ئینا و ته‌رمێ وێ بۆ نۆشداریا داد یا دهۆكێ هاتیه هنارتن.
دیسا هه‌ر دوهی ل گه‌ره‌كا ئاشتی یا ناوچه‌داریا چه‌مانكێ یا گرێدایی ده‌ڤه‌رداریا ئامێدیێ ژنه‌كێ ب گۆله‌یێ خوه كوشت، ئه‌وێ ژنێ ب چه‌كێ نێچیرێ د مالا بابێ خوه دا ب گۆله‌یه‌كێ دووماهی ب ژیانا خوه ئینا، دیسا ئه‌و ژنه ژ دایكبوویا سالا 1996ێ یه و هه‌تا نوكه ئه‌گه‌رێن خوه كوشتنا وێ نه‌هاتینه زانین، ته‌رمێ وێ بۆ نۆشداریا داد هاتیه ڤه‌گوهاستن.
دیسا هه‌ر دوهی كه‌سه‌كی ل نێزیك نه‌خۆشخانا ڤه‌ژین ل سه‌نته‌رێ باژێرێ دهۆكێ دو گۆله ل خوه دان، لێ گیانێ خوه ژ ده‌ست نه‌دا و یێ برینداره.
