چار كه‌س ژ ئه‌گه‌رێ په‌قینا مینان بوونه قۆربانی
ئه‌ڤرۆ، مه‌حمود نهێلی:
رێڤه‌به‌رێ ناوچه‌داریا ئه‌ترووش بۆ ئاژانسا خانی ڕاگه‌هاند، ل ئێڤارییا دوهی ل ده‌ڤه‌را ئه‌ترووش مینه‌كا چاندی ب دو كه‌سانڤه په‌قیه و پێیه‌كێ ئێك ژ وان ژێڤه‌كریه.
شێردل سمۆ، رێڤه‌به‌رێ ناوچه‌داریا ئه‌ترووش دیار كر، مینه‌كا چاندی ب دو گه‌نجانڤه ل پشتا كه‌لها كانیكا ل ده‌ڤه‌را ئه‌ترووش ل سه‌ر سنوورێ ناوچه‌داریێن ئه‌ترووش و چه‌مانكێ په‌قیه و برینداربووینه و بۆ نه‌خۆشخانه‌یا هه‌وارهاتنا دهۆكێ هاتینه ڤه‌گوهاستن.
دیسا ل ناوچه‌داریا كانی ماسێ ژی و ژ ئه‌نجامێ په‌قینا مینه‌كێ دو گه‌شتیارێن دانیماركی، كو ب پایسكلێ سه‌را ده‌ڤه‌رێ دابوو بوونه قوربانی.
ل گور ئاخڤتنا خه‌لكێ ده‌ڤه‌رێ، ئه‌ڤ گه‌شتیاره ب رێكا ده‌ریێ سه‌رزێری و ب پایسكلێ هاتنه د ناڤ ئاخا هه‌رێمێ دا، ل سه‌ر رێیا سه‌رزێری بۆ كانی ماسێ رێیا خوه خه‌له‌ته كریه و چووینه رێیا ئاخێ و ل نێزیك گرێ باروخێ مینه‌ك پێڤه په‌قیه و د ئه‌نجام دا ئێك ژ وانا گیانێ خوه ژ ده‌ست دایه و ئێك ژی بریندار بوویه بناڤێن (تۆبجۆن هۆبدن، یۆهانس وێلیام) كو ژیێ وان 28 سالن.
