چار وەلاتێن جیهانێ سەبارەت ب سووریێ داخوازەکێ دکەن
چار وەلاتێن بهێز یێن جیهانێ دیار کرن، ئەو ژ نێزیکڤە دووڤچوونا رەوشا نها یا سووریێ دکەن و دڤێت ل سووریێ شەرێ نها بهێتە راگرتن دا چو مەترسی ل سەر ژیانا خەلکی دروست نەبن، چونکی ئالۆزیێن ڤێ دووماهیێ کاریگەریا خوە ل سەر ژیانا ب ملیۆنان وەلاتیێن سڤیل کریە.
هەر یەک ژ ئەمریکا، بریتانیا، فرەنسا و ئەلمانیا د داخۆیانیەکێ دا دیار کرن، ئالۆزیێن ڤێ دووماهیێ یێن ل سووریێ کاریگەریا خوە یا گەلەک خراب ل ژیانا ب ملیۆنان کەسان ل سووریێ کریە، نها ب سەدهزاران وەلاتیێن سڤیل ژ بەر شەڕی ل حەلەبێ ئاوارە بووینە، ئەو یەک ژی نیشا ددەت دڤێت ئالۆزیێن ل سووریێ ب دووماهی بهێن و رەوش ئاسایی بیت.
هەر چاوا وەلاتان ئەو یەک ژی دیار کرینە، ئەو ژ نێزیکڤە دووڤچوونا رەوشا نها یا سووریێ دکەن و ئالۆزیێن ل سووریێ دڤێت بهێنە چارەسەرکرن، چونکی ژ بەر ئالۆزیێن نها دێ زیانێن گەلەک مەزن گەهنە وەلاتیێن سڤیل ل دەڤەرێن جودا جودا یێن ل سووریێ و هەروەسا ئالۆزیێن ڤێ دووماهیێ دێ جارەکا دی بیتە ئەگەرێ بهێزبوونا داعشێ و گرۆپێن دی یێن تیرۆرستی، ژ بەر ڤێ یەکێ ژی گەلەک یا گرنگە هەموو وەلاتێن جیهانێ کار بۆ چارەسەریەکا سیاسی بۆ ئالۆزیێن ڤێ دووماهیێ ل سووریێ بکەن.
ل ئالیێ دی مەزلوم عەبدی فەرماندارێ گشتی یێ هێزێن سووریا دیموکرات ژی دیار کر، گرۆپێن چەکدار یێن سەر ب تورکیا ل چەندین بەرەیان ئێرشی هێزێن وان کرینە و نها شەڕەک مەزن د ناڤبەرا وان و گرۆپێن چەکدارێن سەر ب تورکیا دا هەیە و هێزێن وان دێ ب هەموو شیانێن خوە خەلکی پارێزن.
مەزلوم عەبدی ئەو یەک ژی دیار کریە، دڤێت گرۆپێن چەکدار رێ بدەن وەلاتیێن سڤیل یێن ل تاخێن حەلەبی و هەرێمێن دی ڤەگەرنە ڤە جهێن ئارام، لێ مخابن نها گرۆپێن چەکدار یێن سەر ب تورکیا ئاستەنگیان ل هەمبەر ڤەگەریانا وەلاتیێن سڤیل یێن وان دەڤەران ژی دروست دکەن.
ل ئالیێ دی بەرپرسەکێ رێڤەبەریا خوەسەر یا رۆژئاڤایێ کوردستانێ ژی دیار کر، ئارمانجا سەرەکی یا تورکیا و گرۆپێن چەکدار نەهێلانا رێڤەبەریا خوەسەر یا رۆژئاڤایێ کوردستانێ یە، گرۆپێن چەکدار پشتی حەلەب و ئدلبێ دێ ئێرشی دەڤەرێن کوردی کەن، ژ بەر ڤێ یەکێ ژی وان بەری دو رۆژان داخواز ژ هەموو وەلاتیێن کرینە یێن بشێن بلا چەکی راکەن و بەرگریێ ژ ئاخا خوە بکەن، وەکو رێڤەبەریا خوەسەر و هێزێن سووریا دیموکرات ئەو دێ هەتا دووماهیێ ل هەمبەر ئێرشێن وان گرۆپێن تیرۆرستی بەرگریێ ل ئاخ و خەلکێ خوە کەن، هەروەسا دڤێت ئەمریکا و هەڤپەیمانیا شەڕێ ل دژی داعشێ ژی کوردان ب تنێ نەهێلن و رێ نەدەن گرۆپێن چەکدار ئێرشی دەڤەرێن کوردی یێن رۆژئاڤایێ کوردستانێ بکەن.
