چار پانزینخانه بۆ ته‌كسی و پاس و مینی پاسان دێ هێنه زێده‌كرن
زاخۆ،عه‌لی حاجی:
سه‌رپه‌رشتێ به‌لاڤكرنا به‌رهه‌مێن پترۆلێ ل ئیداره‌یا سه‌ربخوه یا زاخۆ بۆ رۆژناما ئه‌ڤرۆ دیار كر، هه‌تا نوكه پرۆسه‌یا گازا سپی ل قه‌زا باتیفا و ناحیێن ده‌ركار و بێگوڤا ب دووماهی هاتیه و ئه‌و پرۆسه‌یه ژی ل ناحیا رزگاری به‌رده‌وامی پێ دهێته دان.
نیشان بورغوس، سه‌رپه‌رشتێ به‌لاڤكرنا به‌رهه‌مێن پترۆلێ ل ئیداره‌یا سه‌ربخوه یا زاخۆ گۆت: “ل دووڤ پلانا حكومه‌تا هه‌رێما كوردستانێ كو سالانه به‌لاڤكرنا گازا سپی ل ده‌ڤه‌رێن چیایی ده‌ست پێ دكه‌ت، بۆ ئه‌ڤ ساله ژی مه ل ده‌ڤه‌رێن چیایی ل ئیداره‌یا سه‌ربخوه یا زاخۆ ده‌ست پێكر و ل ده‌ڤه‌رداریا باتیفا و ناحیا بێگوڤا گازا سپی ل سه‌ر چار هزار و 838 خێزانان هاته به‌لاڤكرن و ل ناحیا ده‌ركارێ ژی ل سه‌ر چار هزار و 18 خێزانان هاته به‌لاڤكرن، دیسا د نوكه دا ل ناحیا رزگاری ئه‌و پرۆسه‌یه یا به‌رده‌وامه و ل وێ ناحیێ ژی گازا سپی ل سه‌ر هزار و 648 خێزانان دێ هێته به‌لاڤكرن و هه‌تا چار رۆژێن دیتر ئه‌و پرۆسه‌یه دێ ب دووماهی هێت”.
گۆتژی: “ل دووڤ وێ رێككه‌ڤتنا د ناڤبه‌را حكومه‌تێن عیراق و كوردستانێ دا هاتیه كرن، هه‌كه پشكا پارێزگه‌ها دهۆكێ هاته زێده‌كرن، هه‌موو وه‌لاتێن سنوورێ ئیداره‌یا سه‌ربخوه یا زاخۆ دێ گازا سپی وه‌رگرن”.
ناڤهاتی زێده‌تر گۆت: “ل دووڤ بزاڤێن به‌رده‌وامێن قایمقامێ قه‌زا زاخۆ ژ بۆ زێده‌كرنا پانزینخانه‌یێن به‌لاڤكرنا پانزینا كار ل زاخۆ، پانزینخانه‌یێن ته‌كسی و كوسته‌ر و مینی پاسان دێ هێنه جوداكرن و چار پانزینخانه ل زاخۆ بۆ وان ترۆمبێلان دێ هێنه ده‌ستنیشان كرن و هه‌ر 15 رۆژان ژی دێ بۆ پانزینخانه‌یه‌كێ بیت”.
