چار پایسكلڤانێن پارێزگەهێ ب برۆنزییا عەرەبی سالا 2023ێ ب دووماهی ئینا
هەر چار یاریزانێن پارێزگەها دهۆكێ و هەلبژارتیێ ئیراقێ سەربەست عەبدوللا، وەهبی سلێمان، ئاریۆس سلێمان و یوسف جیهاد ب میدالیێن زێڤی سالا 2023ێ دووماهی ئینا، پشتی د یاریێن خوە یێن ل سەر ئاستێن جودا رێزێن سێیێ هاتن، ژ چارچووڤێ قارەمانییا عەرەبی ئەوا هەڤڕكیێن وێ ل ریاز پایتەختێ سعۆدیێ ب پشكدارییا 10 وەلاتێن عەرەبی هاتییە كرن.
تارق سەعید راهێنەرێ یانەیا دهۆك و هەلبژارتیێ ئیراقێ بۆ رۆژنامەیا ئەڤرۆ گۆت: ل سەر ئاستێ پێشكەفتیان بۆ درێژاهییا 31كم بەریكانەیا كت دژی دەمژمێر د ماوەیێ 39 خولەك، ئێك چڕكە و84 پشك ژ چڕكەكێ رێزا سێیێ هات كێمتر دو خولەكان ژ خودانێ رێزا ئێكێ یێ ئیماراتی، ژلایێ خوەڤە ل سەر ئاستێ پێشكەفتیان سەربەست عەبدوللا شیا برۆنزییا بەریكانەیا كت بۆ 160كم ب دەستخوەڤە بینت ب سێ دەمژمێر، 40 خولەك و شەش چڕكە رێزا سێیێ بهێت.
هەروەسا ناڤهاتی دیار كر بۆ ئاستێ تازەپێگەهشتیان هەردو یاریزانێن پارێزگەهێ ئاریۆس سلێمان و یوسف جیهاد دگەل هەلبژارتیێ ئیراقێ بۆ بەریكانەیا گشتی هەلبژارتیێن عەرەبی بۆ 31كم شیان رێزا سێیێ بهێت ب 43 خولەك، 38 چركە و نەهـ پشك ژ چركەكێ تۆماربكەن، ژلایەكێ دووڤە هەردو كچێن كورد و هەرێما كوردستانێ لانیا هادی بۆ بەریكانەیا 41كم میدالییا برۆنزی و داهات كاوە بۆ بەریكانەیا 30كم میدالییا زیڤی ب دەستڤە ئینان.
ل دووماهیێ تارق سەعید گۆت: پێخوەشحالین ل سەر هەرچار ئاستان یاریزانێن مە یێن پارێزگەهێ و هەرێما كوردستانێ شیاین میدالیێن زیڤی و برۆنزی ب دەستڤە بینن و ئەڤەژی وێ چەندێ دگەهینت مە یاریزانێن خودان شیان هەنە ل سەر ئاستێ عەرەبی و ئاسیا و ئەو زەحمەتا ئەم دبەین د راهێنانان دا تا رادەكی بوویە بەرهەمەكێ گەلەك باش
بۆ زانین هەشت یاریزانێن پارێزگەهێ و یانەیا دهۆك پشكداری قارەمانیێ بووینە، ل سەر ئاستێ پێشكەفتیان وەهبی سلێمان یاریزانێ سیناعە، سەربەست عەبدوللا و نەوزاد مستەفا یاریزانێن یانەیا كۆیە، هەروەسان پێنچ یاریزانێن یانەیا دهۆك ل سەر ئاستێ تازەپێگەهشتیان هەر ئێك ژ ئاریوس سلێمان، ئیبراهیم سەمیر، محەمەد سادق نوری، یوسف جیهاد و بیرهات نەبی و راهێنەرێ وان تارق سەعید كو بوویە راهێنەرێ لاوان و پێشكەفتیێن ئیراقێ ژی ژبەر شیانێن وی.
