چار یاریزانێن یانەیا ئافرەتێن دهۆكێ دگەل هەلبژارتیێ ئیراقێنە
قەیس وەیس:
ل شەمبییا بۆری هەلبژارتیێ ئیراقێ یێ فوتسالێ ل سەر ئاستێ كچان پشكداری د كۆپا ئاسیا دا كرییە ئەوا نوكە هەڤڕكیێن وێ ل وەلاتێ تایلەندێ دهێنە كرن و ئیراق د كۆما ئێكێ دا یە پێكهاتینە ژ فلەستین، لوبنان، بەحرەین و تایلەند مێڤاندارا قارەمانیێ ئەوا 20 هەلبژارتێن ئاسیا پشكدارن و هاتینە بەلاڤكرن ل سەر چار كۆمان، یاریێن وان ب شێوازێ خول ئێك قۆناغ دهێنە كرن، د هەر كۆمەكێ دا دو هەلبژارتی دگەل دو باشترین هەلبژارتیێن رێزێن سێیێ دهێن دێ بنە 12 هەلبژارتی و دێ دەربازبنە قۆناغا دووماهیێ ئەوا دێ ل ئەیارا ئەڤ سالە ل وەلاتێ چینێ هێنە كرن.
هەلبژارتیێ ئیراقێ پشت گەرمییا خوە ب حەفت یاریزانێن كچێن كوردستانی ژ وانا چار یاریزانێن یانەیا ئافرەتێن دهۆكێ كرینە، ئەو ژی، سیپەل شوكر، دێرین مەحمۆد، خەلات ئەسعەد، فائیزا جەلال، رۆژین محەمەد، ئاواز یونس و سۆز كازم كو دبیتە پرانییا وان یاریزانێن سەرەكی نە دگەل هەلبژارتیێ ئیراقێ.
ل دۆر ڤێ یەكێ سیپەل شوكر كاپتنا یانەیا ئافرەتێن دهۆكێ و هەلبژارتیێ ئیراقێ بۆ رۆژنامەیا ئەڤرۆ گۆت: پێخوەشحالین پرانییا یاریزانێن هەلبژارتیێ ئیراقێ یێ فوتسالێ كچێن كوردستانی نە كو دگەهنە حەفت یاریزانان، نە بتنێ ناڤ دگەل دانە بەلكۆ ڕاهێنەرا هەلبژارتیێ ئیراقی یا پۆرتۆگالی ڤیێرا پیتنكۆر پشت گەرمی ب هەموو یاریزانان كرییە و ئەڤە ژی نیشان ددەت كو یاریزانێن كوردستانی جهێ باوەریێ نە و گەشبینن بۆ یاریێن داهاتی باشترین ئاست نیشان بدەین وەكو كچێن كوردستانی.
