چامپیۆنزا ئه‌ڤرۆ تۆلڤه‌كرن و مسۆگه‌ركرنا ده‌ربازبوونێ یه
ئه‌ڤرۆ
بڕیاره ئه‌ڤرۆ ده‌ست ب هه‌ڤڕكیێن گه‌ڕا چارێ ژ قۆناغا هاتنێ یا قاره‌مانیا یانێن ئۆرۆپا قاره‌مانێن خولا چامپیۆنز لیگ ب ئه‌نجامدانا هه‌شت یاریان بهێنه ئه‌نجامدان كو دهێته هژمارتن قۆناغه‌كا گرنگ بۆ پرانیا یانه‌یێن پشكدار ژ وانا ده‌ربازبوونا خوه دێ بۆ قۆناغا 16ێ مسۆگه‌ر كه‌ن.
د كۆما پێنجێ دا.
یاریا ئێكێ یا ڤێ كۆمێ د ناڤبه‌را دو تیمێن زلهێز یێن ئۆرۆپا ئه‌ی سی میلان یا ئیتالی ب دروشمێ تۆلڤه‌كرن و ڤه‌كه‌ڕاندنا سێ خالێن یاریا بوری یا قۆناغا چوونێ دێ مێڤانداریا چێلسی یا ئنگلترا كه‌ت د یاریه‌كا ڤه‌كری و پری هه‌ڤڕكی بیت، ل یاریگه‌ها خوه چێلسی شیابوو ب سێ گۆلان سه‌ركه‌فتنێ تۆماربكه‌ت، یانا ئنگلترایێ و ئیتالی ب چار خالان رێزێن دویێ و سێیێ دهێن، لێ بۆ ئه‌ڤرۆ هه‌ردو تیم لبن گڤاشتنێن مه‌زن دانه و تیما خوساره‌ت دوور نینه باجا مه‌زن بده‌ت و ده‌ربازبوون ب زه‌حمه‌ت كه‌ڤیت، د یاریا دویێ یا ڤێ كۆمێ دا دینامۆ زاگرب یا كرواتی خودانا سێ خالان رێزا چارێ دهێت ل یاریگه‌ها خوه دێ مێڤانداریا رێد بۆل سالزبۆرگ یا نه‌مسایی كه‌ت خودانا سه‌رێ لیستێ ب پێنچ خالان، بزاڤێن دووماهیێ بۆ خودانێن ئه‌ردی دڤێت سه‌ركه‌فتنێ تۆماربكه‌ت پێخه‌مه‌ت ڤه‌گه‌ڕاندنا هیڤیێن ده‌ربازبوونێ لێ سالزبۆرگ ب سانه‌هی سه‌رێ لیستێ ده‌ست به‌رناده‌ت و دێ بۆ پاراستنا سه‌رێ لیستێ كه‌ت، هه‌ردو یاری ده‌مژمێر 10ی شه‌ڤ هێنه ئه‌نجامدان.
د كۆما شه‌شێ دا.
قاره‌مانا وه‌رزێ بوری و خودانا سه‌رێ لیستا ڤێ كۆمێ ریال مه‌درید یا ئسپانی دێ ل یاریگه‌ها دۆنباس بیته مێڤانا شاختار دۆنێتسك یا ئۆكراینی، د یاریا چوونێ دا ل سانتیاگۆ بیرانابیۆ ریالێ سه‌ركه‌فتنه‌كا ب زه‌حمه‌ت ئینابوو ب دو گۆلان به‌رامبه‌ر گۆله‌كێ، یاریا ئه‌ڤرۆ دێ تاقیكرنه‌كا دی یا بهێز بیت بۆ یانا ئسپانی ئه‌وا نوكه نه‌ه خالان سه‌رێ لیستێ دهێت و شاختار ب چار خالان رێزا دویێ دهێت ژبه‌ركو خودانێن ئه‌ردی ناهێلیت رێزا دویێ ژ ده‌ست بده‌ت دێ بزاڤێن مه‌زن بۆ ده‌ستڤه ئینانا سێ خالان كه‌ت و دووركه‌ڤیت ژ هه‌ڤڕكیێن خوه، ژلایێ خوه‌ڤه لایبزیك خودانا سێ خالان رێزا دویێ چو رێ نینن ژبلی سه‌ركه‌فتنێ ل سه‌ر سێلتیك یا ئسكوتله‌ندی ئه‌وا ب تنێ خاله‌ك كۆمكرین و رێزا چارێ دهێت و دێ بزاڤێ كه‌ت دناڤ ئه‌رد وجه‌ماوه‌رێ خوه‌دا بۆ ده‌ستڤه ئینانا ئه‌نجامێ یاریێ، هه‌ردو یاری ده‌مژمێر 10 شه‌ڤ هێنه كرن.
د كۆما حه‌فتێ دا.
ل یاریگه‌ها پاركن یانا كۆبنهاگن یا دانیماركی دێ هه‌مبه‌ری ئێك ژ به‌ربژارێن بهێز یێن ده‌ستڤه ئینانا ناسناڤێ چامپیۆنزێ بیت ئه‌و ژی مانچسته‌ر ستی یا ئنگلترایێ یا سه‌رێ لیستێ ب نه‌ه خالان، خودانێن ئه‌ردی بتنێ خاله‌ك كۆمكرینه و رێزا چارێ دهێت و باش دزانیت ئه‌ركێ وێ ب سانه‌هی نینه هه‌مبه‌ری به‌ربژاره‌كا بهێز و خودان چه‌ند ستێرێن ناڤوده‌نگ وه‌كو ئیرلینگ هالاند و دی برۆین، ئه‌ڤ یاریه ل ده‌مژمێر7:45 شه‌ڤ هێته ئه‌نجامدان، د یاریا دویێ یا ڤێ كۆمێ دا یانا سیڤییا یا ئسپانی دێ ل ئه‌لمانیا بیته مێڤانا بۆرۆسیا دۆرتموند، یانا ئسپانی خاله‌ك كۆمكریه رێزا سێیێ دهێت و بۆرۆسیا ب شه‌ش خالان رێزا دویێ وه‌رگرتیه، سیڤییا پێدڤی ب موعجیزه‌كێ یه هه‌تا بشێت هیڤیێن خوه یێن چامپیۆنزێ ڤه‌گه‌ڕینیت، ئه‌ڤچه‌نده هه‌مبه‌ری یانه‌كا وه‌كو بۆرۆسیا ب زه‌حمه‌ته ئه‌وا ل یاریگه‌ها وێ ب چار گۆلان به‌رامبه‌ر گۆله‌كێ سه‌ركه‌فتن ل سه‌ر ئینایی ئه‌ڤچا ل یاریگه‌ها خوه دا ب سانه‌هی نابیت خالان ژ ده‌ست بده‌ت، یانا ئسپانی د خرابترین كاودانێن خوه دا یه ل چامپیۆنزێ كو ژ سێ یاریان هه‌شت گۆل ل سه‌ر هاتینه تۆماركرن و گۆله‌ك یا هه‌یی، بزاڤێن وێ بۆ سه‌رێ لیستێ و یا دویێ نه‌ماینه بتنێ بۆ رێزا سێیێ و پاشتگۆهێ ئۆرۆپی وه‌ربگریت، ئه‌ڤ یاریه ل ده‌مژمێر 10 شه‌ڤ هێته كرن.
د كۆما هه‌شتێ دا.
د چارچووڤێ ڤێ كۆمێ دا ئێك ژ یاریێن ئاگرین دێ دناڤبه‌را خودانێن ئه‌ردی و ئێك ژ به‌ربژاران بۆ ناسناڤی پاریس سانجێرمان یا فره‌نسی و به‌نڤیكا یا پۆرتۆگالی، هه‌ردو تیم هه‌ڤڕكێن بهێزن بۆ سه‌رێ لیستێ ئه‌وێن رێزێن ئێكێ و دویێ دهێن ب حه‌فت خالان، د یاریا بوری دا ل باژێرێ له‌شبۆنه هه‌ردو ب گۆله‌كێ وه‌كهه‌ڤبوون لێ یاریا ئه‌ڤ شه‌ڤه دبیت خودانا سه‌رێ لیستێ ئێكلاكه‌ت، پشتبه‌ستنا یانا فره‌نسی دێ بسێ گۆشا ترسێ بیت ئه‌وژی مباپی، مێسی و نیمار، ئه‌ڤ یاریه ژی ده‌مژمێر 10 شه‌ڤ هێته كرن، د یاریه‌كا دی یا ڤێ كۆمێ دا پشتی ده‌ستپێكه‌كا خراب یا یانا یۆڤانتۆس یا ئیتالی ل گه‌ل مكابی حه‌یفا یا ئسرائیل د ناڤ یاریگه‌ها خوه دا، گه‌شبینه بۆ یاریا ئه‌ڤرۆ دوباره سێ خالێن دی ب ده‌ستڤه بینت ئه‌ڤ جاره دێ بیته مێڤانا وێ ب ئارمانجا ڤه‌گه‌ڕاندنا هیڤیێن ده‌ربازبوونێ، یاری دێ ل ده‌ژمێر 7:45 شه‌ڤ هێته ئه‌نجامدان.
