چامپیۆنز دێ ب دیدارێن ئاگرین و دەربازبوون بۆ قۆناغا 16ێ دەستپێكەن
چاڤەڕێ دهێتە كرن ئەڤرۆ هەتا نەهـ یانە دێ بزاڤێ كەن دەربازبوونا خوە بۆ قۆناغا 16ێ مسۆگەر بكەن پشتی ل دانێ شەڤێ یاریێن خوە یێن گەڕا پێنجێ ژ هەڤڕكیێن قارەمانییا یانەیێن ئۆرۆپا قارەمانێن خولا چامپیۆنز ئەنجامبدەت.
د كۆما پێنجێ دا
لاتسیۆ- سێلتیك
فاینۆرد رۆتردام – ئەتلەتیكۆ مەدرید
ل دەمژمێر 8:30 شەڤ یانەیا لاتسیۆ یا ئیتالی ل یاریگەها خوە ئۆلمپیك دێ مێڤاندارییا یانەیا سێلتیك یا ئسكوتلەندی كەت، یانەیا ئیتالی خودانا حەفت خالان رێزا دویێ دهێت، مێڤانا وێ سێلیتك ب تنێ ئێك خال هەیە رێزا چارێ و دووماهیێ دهێت، سەرباری هیڤیێن دەربازبوونێ بۆ قۆناغا 16ێ ژ دەستداینە لێ دێ بزاڤێ كەت بۆ پلێتەكا كۆپا خولا ئۆرۆپایێ كەت كو ئێك ژ باشترین تیمێن سێیێ دەرباز دبیت، لاتسیۆ باش دزانیت خوسارەتییا ڤێ یاریێ باجا وێ یا گرانە ژبەركو تیما فینۆرد یا هۆلەندی هەڤڕكا وێ یە، لەوما ب تنێ بۆ سێ خالێن یاریێ و پاراستنا جهێ خوە و هیڤیێن سەرێ لیستێ ژی هەكەر تیما ئەتلەتیكۆ مەدرید یا ئسپانی تووشی ئەنجامەكێ خراب بوو، ژبەركو ئەتلەتیكۆ ل رێزا ئێكێ د هێت ب هەشت خالان و دێ بیتە مێڤانا یانەیا سلێلیتك ئەوا ب خالەكێ رێزا چارێ دهێت، بۆ زانین ئەڤ یارییە ل دەمژمێر 11ێ شەڤ هێتە كرن.
كۆما شەشێ
میلان- بۆرۆسیا دۆرتمۆند
پاریس سانجێرمان- نیۆكاسل
ئێك ژ یاریێن هەر ب هێز یێن ئەڤ شەڤە دناڤبەرا خودانێن ئەردی ئەی سی میلان یا ئیتالی و بۆرۆسیا دۆرتمۆند یا ئەلمانی، میلان پێدڤی ب سەركەفتنێ هەیە ژبۆ بەردەوامی دان ب هیڤیین خوە ئەوا نوكە بتنێ پێنج خال كۆمكرین و رێزا سێیێ دهێت، بەرانبەر دا بۆرۆسیا ئێك پێنگاڤ مایە بۆ دەربازبوونێ بەر ب قۆناغا 16ێ ژبەركو حەفت خال كۆمكرینە و سەركەفتنا ڤێ یاریێ دێ مسۆگەر بیت، ژلایەكێ دووڤە یانەیا پاریس سانجێرمان یا فرەنسی دێ مێڤاندارییا نیۆكاسل یا ئنگلتەرایێ كەت ئێك ژ یانەیێن بووینە هەستێ رەش، پاریس د خەونێن چامپیۆنزێ دا مایە و شەڕێ بەردەوام دكەت ژبۆ گەهشتن بۆ ئەوێ ئارمانجێ و هەتا نوكە شەش خال كۆمكرینە و یارییا ئەڤ شەڤە چو بژاردە نینن ژبلی سەركەفتنێ، لێ یانەیا ئنگلتەرایێ پاریەكێ ب سانەهی نابیت و ئەوێ ژی حەزێن دەربازبوونێ هەنە سەرباری رێزا چارێ دهێت ب چار خالان لێ كەفتنا هەر تیمەكا دی و سەركەفتنا وێ دێ هیڤیێن وێ گەشتر لێكەت، بۆ زانین هەردو یاری دێ ل دەمژمێر 11ێ شەڤ هێنە كرن.
كۆما حەفتێ
مانچستەر ستی- لایپزیك
یۆنگ بۆیز- سرڤینا زڤیزدا
هەرچەندە هەردو یانەیێن مانچستەر ستی یا ئنگلتەرایێ و لایپزیك یا ئەلمانی دەربازبوونا خوە بۆ قۆناغا 16ێ مسۆگەر كرینە، لێ دهێتە پێشبینیكرن یارییەكا خوەش بهێتە دیتن، مان ستی ب 12 خالان بێ خوسارەتی سەرێ لیستێ پاراست و لایپزیك ب نەهـ خالان رێزا دویێ دهێت، مسۆگەركرنا دەربازبوونێ هات پشتی هەردو یانەیێن د كۆما واندا یۆنگ بۆیز و سرڤینا زڤیزدا یا سربیا هەر ئێك خالەك كۆمكرییە ژ وەكهەڤییەكێ ئەو وەكهەڤی ژی یارییا دناڤبەرا واندا بوو، ئەوا دێ ئەڤ شەڤە دوبارە بەرانبەر ئێك بن و شەڕی كەن بۆ سەركەفتنەكێ بەلكو پلێتەكا دەربازبوون بۆ كۆپا خولا ئۆرۆپایێ، بۆ زانین هەردو یاری دێ ل دەمژمێر 11ێ شەڤ هێتە كرن.
كۆما هەشتبەرشەلۆنا- پۆرتۆ
شاختار دۆنێتسك- رۆیال ئانتۆب
ئێك ژ دیدارێن ئاگرین و جەماوەرێ وەرزشی چاڤەرێ یا ئەڤ شەڤە دناڤبەرا یانەیا بەرشەلۆنا یا ئسپانی و مێڤانا وێ پۆرتۆ یا پۆرتۆگالی ئەوا دێ ل دەمژمێر 11ێ شەڤ ل یاریگەها كامب نوو هێتە كرن، هەرچەندە هەردو یانەیان تا رادەیەكێ باش نێزیكی دەربازبوونێ بووینە، پۆرتۆ ب نەهـ خالان و ب هەمان خال بەرشەلۆنا رێزێن ئێكێ و دویێ دهێن، لەوما دێ یارییا ئەگرین بیت بۆ مسۆگەركرنا پلێتا دەربازبوونێ، یانەیا كاتەلۆنێ دێ بزاڤێن دۆبارە سەركەفتنێ كەت و پۆرتۆ دێ شەڕی بۆ پاراستنا سەرێ لیستێ و تۆلڤەكرنێ كەت ئانكو یارییەكا بهێزە، ژلایێ خوەڤە شاختار ژی دناڤ شەڕێ پلێتا قۆناغا 16ێ یە ژبەركو شەش خال هەنە و دێ ل یاریگەها خوە دەمژمێر 8:45 شەڤ مێڤاندارییا یانەیا رۆیال ئانتۆب یا بەلجیكی كەت ئەوا هیچ خالەك نینە و رێزا چارێ دهێت و بێ هیڤییە نەشێت پلێتا قۆناغا 16 و نە دەربازبوون بۆ كۆپا خولا ئۆرۆپا ئانكو دێ هێتە دناڤ یاریێ دا بێ گڤاشتن.
