چامپیۆنز لیگ ڤەگەڕیا میلان دێ پەردێ ل سەر وەرزێ نوو راكەت و مان ستی و بەرشەلۆنا دێ یانەیێن سربیا و بەلجیكا مێڤان كەن
دهێتە چاڤەڕێ كرن ئەڤرۆ وەرزێ نوو 2023- 2024 یا هەڤڕكیێن قارەمانییا یانەیێن ئۆرۆپا قارەمانێن خولا چامپیۆنز لیگ ب ئەنجامدانا هەشت یارییان ژ چار كۆمێن جودا هێنە كرن و بڕیارە سوبەهی هەشت یاری ژ چار كۆمێن دی ژی بهێنە ئەنجامدان، ئەوا جەماوەرێ وەرزشی ل جیهانێ ب گشتی و كوردستانێ تایبەتمەندیەكا باش بۆ ڤێ قارەمانیێ دكەت ژبەر هەبوونا مەزنترین یانەیێن ئۆرۆپا دناڤ هەڤڕكییان دا.
كۆما پێنجێ
د ڤێ كۆمێ دا ئەوا دهێتە هژمارتن یا هەڤسەنگ دناڤبەرا یانەیێن پشكدار دا، یارییا ئێكێ یا ڤێ كۆمێ دێ دناڤبەرا خودانێن ئەردی لاتسیۆ یا ئیتالی و ئەتلەتیكۆ مەدرید یا ئسپانی ل یاریگەها ئۆلمپیكۆ هێتە ئەنجامدان، ئەڤ یارییە بۆ هەردو یانەیا ب هێزی و بەربژارێن سەرەكی نە بۆ پلێتا قۆناغا 16ێ، دیرۆكا یاریێن دناڤبەرا هەردو تیمان بۆ چار جاران بەرانبەری ئێك بووینە، ئەتلەتیكۆ شیابوو دو سەركەفتنا بەرانبەر سەركەفتنە بۆ لاتسیۆ و وەكهەڤیەكێ بووینە، دڤێ یاریێ دا یانەیا ئسپانی دێ بێ بەهربیت ژ ستێرێ خوە تۆماس لیمار ئەوێ تووشی هنگاڤتنێ بوویی، ژلایێ خوەڤە لاتسیۆ دێ بزاڤێ كەت جەماوەرێ خوە ئاشتبكەت پشتی خوسارەتیا بەری چار رۆژانە د خولا ئیتالیا دا بەرانبەر یۆڤانتۆسێ، یاریا دویێ یا ڤێ كۆمێ دێ دناڤبەرا هەردو یانەیێن فینۆرد رۆتردام یا هولەندی و سێلتیك یا ئیسكۆتلەندی ل باژێرێ فینۆرد هێتە كرن، ئەڤ یارییە دبیە یا دویێ دناڤبەرا هەردو یانەیان دا د كاروانێ وان یێ چامپیۆنزێ، بۆ جارا ئێكێ ل سالا 1970ێ بوو و د یارییا دووماهیا چامپیۆنزێ دا بوو دەمێ یانەیا سێلتیك شیایی سەركەفتنێ بینت و ناسناڤێ خوە یێ ئێكانە ب دەستڤە ئینایی، بۆ زانین هەردو یاری دێ ل دەمژمێر 10ـی شەڤ هێنە ئەنجامدان.
كۆما شەشێ
یارییا ئێكێ یا ڤێ كۆمێ و یارییا كۆما حەفتێ دێ بنە دەستپێكا وەرزێ نوو یا هەڤڕكیێن وەرزێ نوو ئەوا بڕیارە یانەیا میلان یا ئیتالی ل یاریگەها خوە سانسیرۆ مێڤاندارییا یانەیا نیوكاسل یا ئنگلتەرایێ ل دەمژمێر 7:45 ـی شەڤ بكەت، خودانین ئەرد ل بن گڤاشتنەكا مەزن دانە تایبەت پشتی بەری چار رۆژان د خولا ئیتالیا دا تووشی مەزنترین خوسارەتی بوو د دێربیێ میلان بەرانبەر ئەنتەر ب پێنج گۆلان بەرانبەر گۆلەكێ، لەوما لەشكەرێ ستیڤانۆ بیۆلی راهێنەرێ تیمێ نەچارن زلهێزییا میلانێ د ڕێیا چامپیۆنزێ دا ڤەگەڕینن، راهێنەر بڕیاردایە گوهۆڕینان دناڤ پێكهاتیێ تیمێ دا بكەت تایبەت هێلا هێرشبرنێ، بەرانبەردا تیما نیوكاسل دهێتە هژمارتن ژ هەڤڕكن چڕ، راهێنەرێ یانەیا ئنگلتەرا ئێدی هاو دیاركربوو ئەو ژ میلانێ نا ترسن و هزرا قۆناغا 16ێ یا كری، لەوما یاری دێ بهێز بیت، د یارییا دویێ یا ڤێ كۆمێ دا كو دهێتە هژمارتن ئێك ژ بهێزترین یاریێن ئەڤرۆ دێ دناڤبەر پاریس سانجێرمان یا فرەنسی و بۆرۆسیا دۆرتمۆند یا ئەلمانی بیت ئەوا ل دەمژمێر 10 شەڤ یاریگەها پارك دی برانس ل پاریسێ هێتە كرن، یانەیا فرەنسی ب خەون و هیڤیێن پاشئێخستی یێن ئەڤە چەند سالە كار بۆ دكە ئەو ژی دەستڤە ئینانا ناسناڤێ ئێكێ یە، دێ بزاڤێ كەت د یارییا ئەڤ شەڤە دا دەست ب ئەڤێ ئارمانجێ بكەت، هەردو یانە بەری ڤێ یاریێ چار جاران بەرانبەری ئێك بووینە دو سەركەفتن بۆ پاریسێ و دگەل دو وەكهەڤییان بووینە.
كۆما حەفتێ
ئێك ژ یاریێن دهێتە هژمارتن كو دێ بیتە ڤەكرنا هەڤڕكیێن چامپیۆنزێ دناڤبەرا یانەیا یۆنگ بۆیز یا سویسری بەرانبەر لایبزیك یا ئەلمانی كو بڕیارە ل دەمژمێر 7:45 شەڤ ل یاریگەها سویس وانكۆرۆفا سویسرا بهێتە كرن، هەردو یانە خودان ئارمانجن و سەركەفتنا ڤێ یاریێ دێ هیڤیێن هەڤڕكییێ دناڤ كۆمێ دا گەشكەت بەری دیدارا قارەمانا وەرزێ بۆری مان ستی بن، بتنێ ئێك جارا بەرانبەر ئێك بووینە ئەوژی ب سەركەفتنا بۆیزێ د یارییەكا هەڤالینی دا بوو، یارییا دویێ یا ڤێ كۆمێ ئەوا دهێتە چاڤەڕێ كرن ل دەمژمێر 10ی شەڤ بهێتە كرن خودانا ئەردی و قارەمانا ناسناڤێ چامپیۆنز لیگ یا وەرزێ بوری مانچستەر ستی یا ئنگلتەرایێ دێ دەست ب بەرەڤانی كرنێ ب ناسناڤێ خوە كەت دەمێ ل یاریگەها خوە ئیتحاد مێڤاندارییا یانەیا سێرڤینا زڤریدا یا سربی دكەت، دبیت ئەڤ یارییە بۆ مان ستی یا ب سانەهی بیت ژبەركو تیما مێڤان ئەو هێز و یاریزانێ ب كۆالێتا ئاست و شیانێن وێ نەبیت.
كۆما هەشتێ
جەماوەرێ یانەیا بەرشەلۆنا یا ئسپانی چاڤەڕێ ئێكەم یارییا تیما خوە ژ چامپیۆنز لیگا یە دەمێ ل یاریگەها خوە كامب نوو مێڤاندارییا یانەیا رۆیال ئانتۆیرب یا بەلجیكی دكەت، هەردو یانە قارەمانێن خولێن وەلاتێن خوەنە، یانەیا بەلجیكی ئەوا پشتی 66 سالان بوویە قارەمان ب زەحمەت گەهشتە چامپیۆنزێ دەرئەنجامێ یاریێن ڤەبر دگەل یانەیا ئایاك ئەسینا یا یۆنانستانی پلێتا دەربازبوونێ وەرگرتبوو، لێ ژبلی قارەمانیا كۆپا ئۆپزێسیۆنێ ل وەرزێ 1965-1966ێ بەرانبەری ئێك بوون و هەر یانەكێ سەركەفتنەك ئینابوو، لێ د چامپیۆنزێ دا دبیتە یارییا ئێكێ یا هەردو یانەیان، یانەیا كاتەلۆنی بەربژارەكا بهێزە نە بتنێ بۆ قۆناغا 16ێ بەلكو هەتا یارییا دووماهیێ ژی و ئەڤچەندە ژی د داخویانیێن بەرپرسێن وەرزشی و كادرێ راهێنانێ یێ یانەیا ئسپانی دهێتە دۆپاتكرن، ژلایێ خوەڤە یانەیا پۆرتۆ یا پۆرتۆگالی دێ ل یاریگەها دۆنباس بیتە مێڤانا یانەیا شاختار دۆنێتسك یا ئۆكراینی د یارییەكا ڤەكری و تۆلڤەكرنێ دا، ژبەركو یانەیا ئۆكراینی د شەش یاریێن دناڤبەرا واندا یێن چامپیۆنێزێ نەشیایە سەركەفتنێ بینن بەلكو سێ خوسارەتی و سێ وەكهەڤی هەبووینە، پۆرتۆ خودانا دو ناسناڤان دووماهی ناسناڤ بەری 20 سالان ب دەستڤە ئینابوو، هەرچەندە ئەڤرۆ دێ یارییا ئێكێ ژ وەرزێ نوو كەت لێ وەكو هەر یانەكێ خەونا ب ناسناڤی دبینت.
