چاندنا ئاكرێ: ئەڤسالە مەترسی ل سەر بەرهەمێ گەنمی هەیە
رەمەزان زەكەریا
ژبەر بارینا بارانەكا زۆر و تێربوونا ئاخێ ب ئاڤێ، رێڤەبەریا چاندنا ئاكرێ هۆشداریێ ددەتە جۆتیاران و رادگەهینیت، پێدڤیە ب زووترین دەم پەینێ ب سەر زەڤیان دا بپڕژینن، ئەگەر دێ گەشەیا گەنمی لاواز بیت و كاریگەریەكا خراب ل سەر بەڕو كوالیتیا بەرهەمی هەبیت.
سەعید جەعفەر، جوتیارەكێ دەڤەرێیە بۆ ئەڤرۆ گۆت: سالێن چوویی باران كێمتر بوو پێشبینیا ڤێ رێژا بارانێ نەدكر، لەورا نوكە یێن چاڤەڕێی دەلیڤەیەكێ نە باران كێم ببیت دا پەینێ بپڕژینن. ژبەر زۆریا بارانێ ئەم نەشێین وەك سالێن چوویی ب رێكا تراكتۆری پەینێ بپڕژینین، لەورا ئەم نەچارین ب دەست كارێ خۆ بكەین.
كاروان جەمال، بەرپرسێ راوێژكاریا چاندنا ئاكرێ بۆ ئەڤرۆ گۆت: كەش وهەوایێ ئەڤ سالە جودایە و بارانەكا باش باریە، بەلێ پێدڤیە جۆتیار گەنم ب پەینا كیمیاوی بپڕژینیت دا كو باشتر گەشە بكەت و بەرهەمێ وی یێ باش بیت، ئەگەر نە زۆریا بارانێ دێ كاریگەریەكا نەرێنی هەبیت و گەنم دێ لاواز بیت.
ناڤبری گۆتژی: كو دێ بیت جۆتیار ب زووترین دەم پەینێ بۆ گەنمێن خۆ بكاربهینن، ژبەركو بێی پەین گەنم دێ زۆر ب لاوازی گەشە كەت و د دەمێ پێگەهشتنێ دا زیانەكا مەزن ب بڕێ بەرهەمی دكەڤیت.
ردوان ئەنوەر، بەرپرسێ وێستگەها كەشناسیا ئاكرێ بۆ ئەڤرۆ گۆت: د وەرزێ زستانا ئەڤ سالە دا، ل سنوورێ ئاكرێ سەرجەمێ گشتی یێن باران بارینێ هەمبەر دگەل پار سال ل سنورێ ئاكرێ. ئەڤسالە ل سەنتەرێ ئاكرێ 583 ملم پار 114 ملم، گردەسێن 352 ملم پار 78 ملم، بجیل 887 ملم پار 162 ملم، دینارتە 906 ملم پار 188 ملم، بەفر بارین ژی ل سنوورێ ئاكرێ بڤی رەنگی بوو ئاكرێ 22 سم، گردەسێن 7 سم، بجیل 12سم، دینارتە 60 سم.
ل گۆرەی ئامارێن رێڤەبەرایا چاندنا ئاكرێ: هەتا نوكە ١٤٠ هزار دۆنەم ئەرد ل سنوورێ ئاكرێ ب گەنمی هاتینە چاندن. ژبەر بارینا بارانەكا زۆر و نەبوونا تیشكا رۆژێ یا پێدڤی، پێدڤیە جۆتیار لەزێ بكەن ل ب كارئینانا پەینێ دا بۆ پاراستنا بەرهەمێن خۆ.
