چاوانیا مفا وه‌رگرتن ژ پشته‌ڤانیا نێڤدواه‌تى د كوربه‌نده‌كی دا هاته گه‌نگه‌شه‌كرن
ئه‌ڤرۆ، ناجی به‌ده‌ل:
دڤان هه‌یامێن چووی دا بویه‌رێن بله‌ز په‌یدا دبن و گوهۆڕين دهاتنه دیتن پر گرێك هاتنه ده‌ربازكرن ل سه‌ر هه‌رێما كوردستانێ ژ ئه‌گه‌رێ هێرشا چه‌كدارێن داعشێ بو سه‌ر ئاخا كوردستانێ و ده‌ر ئه‌نجام ب سه‌دان هزار ژ پێكهاتیێن عیراقێ ده‌ربه‌ده‌ر بوون.
ب له‌ز هاتنه ده‌نگا ئه‌مریكا و ئه‌و پشته‌ڤانیا وه‌لاتێن رۆژئاڤا ل هه‌رێمێ كری ب هه‌موو جورێن هاریكاریێ هه‌ر ژ یێن سه‌ربازی و سیاسی و مرۆڤی.
فه‌كولیتا یاسا و رامیاری ل زانكویا دهۆكێ رابو ب درۆستكرن و دانا كوربه‌نده‌كێ ژ لایێ ئه‌كادیمی و ڤه‌كولین ل سه‌ر چاوانیا مفاوه‌رگرتن ژ پشته‌ڤانیكرنا نێڤده‌وله‌تی بو هه‌رێما كوردستانێ د ئه‌ڤان كاودانان دا.
د.ئیبراهیم سالح رێڤه‌به‌رێ كوربه‌ندی بۆ ئه‌ڤرۆ نیوز گۆت: “ژ بووی زانكو ب ئه‌ركێ خوه یێ مه‌عریفی و ئه‌كادیمی رابیت بۆ جڤاكێ و ئه‌و پرسا نها گرێدای نه‌ته‌وه‌یێ یه، له‌ورا مه ب گرنگ دیت ئه‌ڤی كوربه‌ندی ل سه‌ر چاوانی و سه‌ره‌ده‌ریكرن ل گه‌ل هاریكاریكرنێ و زه‌ره‌ر و مفایێن ئه‌ڤێ هاریكاریێ ب چ شێوه‌نه و دڤێت ئه‌م چ بكه‌ین و چاوا سه‌ره‌ده‌ریێ بكه‌ين ل گه‌ل ئه‌ڤان كاودانان هاتنه گه‌نگه‌شه‌كرن”.
ناڤبری دیاركر ژی دڤێ كوربه‌ندێ دا 22 دكتور و خودان كه‌سانێن سه‌ربور د بیاڤێ ئه‌كادیمی دا به‌شدار بوون و ل داویێ ده‌رئه‌نجامێن وێ دێ هێنه بلندكرن بو جهێن به‌رپرسیار ژ پرسگریكێ.
